പത്തുമാസത്തിനിടെ ഇതാദ്യം; രാജ്യതലസ്ഥാനത്ത് കോവിഡ് മരണമില്ലാത്ത ദിവസമായി ചൊവ്വാഴ്ച

ന്യൂഡല്‍ഹി: പത്തുമാസത്തിനിടെ ആദ്യമായി രാജ്യതലസ്ഥാനത്ത് കോവിഡ് മരണമില്ലാത്ത ദിവസമായിരുന്നു ചൊവ്വാഴ്ച. 24 മണിക്കൂറിനുള്ളില്‍ ഒറ്റ കോവിഡ്​ മരണം പോലും റിപ്പോര്‍ട്ട്​ ചെയ്യപ്പെടാത്ത ദിവസം. ഇന്ന് 100 പേര്‍ക്കാണ് കോവിഡ് സ്ഥിരീകരിച്ചത്. 144 പേര്‍ രോഗമുക്തി നേടി​.

ഡല്‍ഹിയില്‍ ഇതുവരെ 6,36,260 പേര്‍ക്കാണ്​ കോവിഡ്​ സ്ഥിരീകരിച്ചത്​. ഇതില്‍ 6,24,326 പേര്‍ രോഗമുക്തരായിട്ടുണ്ട്​. ഇതുവരെ 10,882 പേരാണ്​ തലസ്ഥാനത്ത്​ കോവിഡ്​ ബാധിച്ച്‌​ മരിച്ചത്​.

നിലവില്‍ 1,052 പേര്‍ ചികിത്സയിലാണ്​. ഇതില്‍ 441 പേരും വീടുകളില്‍ നിരീക്ഷണത്തിലാണ്​. ഡല്‍ഹിയിലെ കോവിഡ്​ മുക്തി നിരക്ക്​ 98.12 ആയി ഉയര്‍ന്നിട്ടുണ്ട്​. ഇതുവരെയുള്ള ഏറ്റവും ഉയര്‍ന്ന നിരക്കാണിത്​.

തലസ്ഥാന നഗരിയില്‍ 950 സ്ഥലങ്ങള്‍ നിലവില്‍ കണ്ടൈന്‍മെന്‍റ് സോണുകളാണ്.

ഡല്‍ഹിയില്‍ കഴിഞ്ഞ 24 മണിക്കൂറിനുള്ളില്‍ 56,410 കോവിഡ്​ പരിശോധനകളാണ്​ നടന്നത്​. ഇതില്‍ 31,300 എണ്ണം ആര്‍.ടി.പി.സി.ആര്‍ പരിശോധനയും 25,110 എണ്ണം ആന്‍റിജന്‍ പരിശോധനയുമാണ്​. ഇതുവരെ ആകെ 1,12,56,961 കോവിഡ്​ പരിശോധനകളാണ്​ ഡല്‍ഹിയില്‍ നടന്നത്​.