സ്കൂൾ തുറക്കുന്നതിനുള്ള അന്തിമ മാര്ഗരേഖ മറ്റന്നാള്, ആദ്യ ആഴ്ച യൂണിഫോം, ഹാജര് എന്നിവ നിര്ബന്ധമല്ല ; വിദ്യാഭ്യാസ മന്ത്രി
സ്കൂള് തുറക്കുന്നതിനുള്ള അന്തിമ മാര്ഗരേഖ മറ്റന്നാള് പുറത്തിറക്കുമെന്ന് വിദ്യാഭ്യാസ മന്ത്രി വി ശിവന്കുട്ടി. സ്കൂള് തുറക്കലുമായി ബന്ധപ്പെട്ട് അധ്യാപക സംഘടനകള് പൂര്ണ്ണ സഹകരണം വാഗ്ദാനം ചെയ്തതായി മന്ത്രി അറിയിച്ചു. അധ്യാപക സംഘടനയുടെ നിര്ദേശങ്ങള് അന്തിമ മാര്ഗരേഖയില് പരിഗണിക്കും. അസുഖങ്ങളുള്ളവരും ഭിന്നശേഷിക്കാരും സ്കൂളില് വരേണ്ടതില്ലെന്ന് മന്ത്രി അറിയിച്ചു.
സ്കൂള് തുറക്കുന്ന ആദ്യ ആഴ്ച യൂണിഫോം, ഹാജര് എന്നിവ നിര്ബന്ധമാക്കില്ലെന്ന് വിദ്യാഭ്യാസമന്ത്രി വി ശിവന്കുട്ടി ചൂണ്ടിക്കാട്ടി. മാര്ഗരേഖ പുറത്തിറക്കിയ ശേഷം ടൈം ടേബിള് വച്ച് കാര്യങ്ങള് നടപ്പിലാക്കും. സ്കൂള് തുറക്കാനുള്ള തയ്യാറെടുപ്പുകള് പുരോഗമിക്കുകയാണെന്നും മന്ത്രി പറഞ്ഞു.
യുവജന സംഘടനകള് ശുചീകരണ പ്രവര്ത്തനങ്ങളില് പങ്കെടുക്കുമെന്ന് ഉറപ്പ് നല്കി. എത്രയും വേഗം മാര്ഗരേഖ പുറത്തിറക്കും. എല്ലാ വിധ പ്രതിരോധ മാര്ഗങ്ങളും സ്വീകരിക്കും. ഷിഫ്റ്റ് സംവിധാനം വിദ്യാലയങ്ങളിലെ സാഹചര്യം അനുസരിച്ച് ക്രമീകരിക്കുമെന്നും മന്ത്രി വി ശിവന്കുട്ടി അറിയിച്ചു.
ക്ലാസില് ഒരേസമയം 20 – 30 കുട്ടികളെ മാത്രമേ അനുവദിക്കൂ. അധ്യാപകരും രക്ഷിതാക്കളും സ്കൂള് ജീവനക്കാരും 2 ഡോസ് വാക്സിന് എടുത്തുവെന്ന് ഉറപ്പു വരുത്തണം. സ്കൂള് തുറക്കുന്നതിനു മുന്പു രക്ഷിതാക്കളുടെയും സ്റ്റാഫ് അംഗങ്ങളുടെയും പ്രാദേശിക ജനപ്രതിനിധികള് എന്നിവരുടെയും യോഗം ചേരും.
ഈ മാസം 20 മുതല് 30 വരെ സ്കൂളുകളില് പൊതുജന പങ്കാളിത്തത്തോടെ ശുചീകരണം, അണുനശീകരണം തുടങ്ങിയവ നടപ്പാക്കുമെന്ന് മന്ത്രി വി. ശിവന്കുട്ടി അറിയിച്ചു. സ്കൂളുകള് കേന്ദ്രീകരിച്ചു രൂപീകരിക്കുന്ന ജനകീയ സമിതികളുടെ നേതൃത്വത്തിലാവും ശുചീകരണം.