വസ്ത്രമഴിച്ച് പരിശോധന: അന്വേഷണം പ്രഖ്യാപിച്ച് കേന്ദ്രം; പൊലീസ് കോളജിലെത്തി
ന്യൂഡൽഹി; കൊല്ലം ആയൂരില് നീറ്റ് പരീക്ഷയ്ക്കെത്തിയ വിദ്യാര്ഥിനിയെ അടിവസ്ത്രമഴിപ്പിച്ച് പരിശോധിച്ചതില് അടിയന്തര അന്വേഷണത്തിന് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ നിര്ദേശം നൽകി. വിദ്യാഭ്യാസ അഡീഷനല് സെക്രട്ടറിയോട് മന്ത്രി റിപ്പോര്ട്ട് തേടി. കേരളത്തില് നിന്നുള്ള ലോക്സഭാംഗങ്ങള് അടിയന്തരപ്രമേയത്തിന് നോട്ടിസ് നല്കിയ സാഹചര്യത്തിലാണ് മന്ത്രിയുടെ ഇടപെടല്. ഹൈബി ഈഡനും കെ.മുരളീധരനുമാണ് ലോക്സഭയില് ചര്ച്ചയാവശ്യപ്പെട്ട് നോട്ടിസ് നല്കിയത്. പ്രശ്നം രാജ്യസഭയില് ഉന്നയിക്കുമെന്ന് കോണ്ഗ്രസ് അംഗം ജെബി മേത്തറും അറിയിച്ചു. എന്നാല് അടിവസ്ത്രം അഴിപ്പിച്ച് പരിശോധിച്ചെന്ന് രേഖാമൂലം പരാതി ലഭിച്ചില്ലെന്നാണ് നാഷണല് ടെസ്റ്റിങ് ഏജന്സിയുടെ നിലപാട്. പരീക്ഷാസമയത്തോ പിന്നീടോ ആരും പരാതി നല്കിയിട്ടില്ലെന്ന് ഏജന്സി വിശദീകരിച്ചു. അടിവസ്ത്രം അഴിപ്പിച്ചുള്ള പരിശോധന അനുവദനീയമല്ല. എന്ടിഎ ഡ്രസ് കോഡില് ഇത്തരം നടപടികള് നിര്ദേശിച്ചിട്ടില്ലെന്നും അധികൃതര് വ്യക്തമാക്കി. അതിനിടെ അടിവസ്ത്രം അഴിപ്പിച്ചതുമായി ബന്ധപ്പെട്ട് വിദ്യാർഥിനികൾ നൽകിയ പരാതിയിൽ പൊലീസ് അന്വേഷണം ആരംഭിച്ചു. സംഭവം നടന്ന ആയൂർ മാർത്തോമ്മാ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ആൻഡ് ടെക്നോളജിയിൽ എത്തിയ പൊലീസ് സിസിടിവി ദൃശ്യങ്ങൾ പരിശോധിക്കും. ”