സന്ദേഹങ്ങളവസാനിച്ചു; സിദ്ധരാമയ്യ കര്ണാടക മുഖ്യമന്ത്രി, രണ്ടുവര്ഷത്തിന് ശേഷം ഡി.കെ
ന്യൂഡല്ഹി: കോണ്ഗ്രസ് വന്ഭൂരിപക്ഷത്തില് വിജയിച്ച കര്ണാടകയില് മുതിര്ന്ന നേതാവ് സിദ്ധരാമയ്യയെ മുഖ്യന്ത്രിയായി തിരഞ്ഞെടുത്തു. ദിവസങ്ങള് നീണ്ട ചര്ച്ചകള്ക്കും സന്ദേഹങ്ങള്ക്കുമൊടുവിലാണ് സിദ്ധരാമയ്യയെ ഹൈക്കമാന്ഡ് തിരഞ്ഞെടുത്തത്. ഔദ്യോഗിക പ്രഖ്യാപനം ഇന്നുണ്ടാകും. ആദ്യ രണ്ടുവര്ഷത്തിന് ശേഷം മുഖ്യമന്ത്രിസ്ഥാനം കെപിസിസി അധ്യക്ഷന് ഡി.കെ.ശിവകുമാറിന് കൈമാറണം എന്ന നിര്ദേശത്തോടെയാണ് കോണ്ഗ്രസ് നേതൃത്വം സിദ്ധരാമയ്യയെ മുഖ്യമന്ത്രിയായി തിരഞ്ഞെടുത്തത്. മുന് നിശ്ചയിച്ചതുപോലെ വ്യാഴാഴ്ച സത്യപ്രതിജ്ഞ നടക്കുമെന്നാണ് കോണ്ഗ്രസ് വൃത്തങ്ങള് പറയുന്നത്. ഇന്ന് സിദ്ധരമായ്യ രാഹുല് ഗാന്ധിയുമായി നടത്തിയ ചര്ച്ചയ്ക്ക് പിന്നാലെയാണ് മുഖ്യമന്ത്രി പദം സംബന്ധിച്ച് നിലനിന്നിരുന്ന അനിശ്ചിതത്വങ്ങള് അവസാനിച്ചത്. ഡി.കെ.ശിവകുമാറും രാഹുലുമായി ഇന്ന് ചര്ച്ച നടത്തും. അതേ സമയം ഡി.കെ.ശിവകുമാര് മന്ത്രിസഭയുടെ ഭാഗമാകുമോ എന്നത് സംബന്ധിച്ച് തീരുമാനമായിട്ടില്ല. ഇത് രണ്ടാം തവണയാണ് സിദ്ധരാമയ്യ കര്ണാടക മുഖ്യന്ത്രിയാകുന്നത്. 2013 മുതല് 2018 വരെയാണ് അദ്ദേഹം ആദ്യ തവണ മുഖ്യമന്ത്രിയായിരുന്നത്.ഇത്തവണ വരുണയില് നിന്ന് തിരഞ്ഞെടുക്കപ്പെട്ട സിദ്ധരാമയ്യ 46,163 വോട്ടുകള്ക്കാണ് വിജയിച്ചത്. 224 അംഗ കര്ണാടക നിയമസഭയിലേക്ക് നടന്ന തിരഞ്ഞെടുപ്പില് 135 സീറ്റുകള് നേടിയാണ് കോണ്ഗ്രസ് അധികാരം പിടിച്ചെടുത്തത്.