വിധി നേരത്തെ തയ്യാറാണ്; ഇതെല്ലാം നാടകം; നടിയെ ആക്രമിച്ച കേസില് കോടതിക്കെതിരേ ഭാഗ്യലക്ഷ്മി
കൊച്ചി: നടിയെ ആക്രമിച്ച കേസില് കോടതിക്കെതിരേ വിമര്ശനമുന്നയിച്ച് ഭാഗ്യലക്ഷ്മി. കേസില് കോടതി നാടകം കളിക്കുകയാണെന്നും വിധി നേരത്തെ എഴുതിവെച്ചിട്ടുണ്ടെന്നും ഭാഗ്യലക്ഷ്മി മാധ്യമങ്ങളോട് പറഞ്ഞു. നീതിപീഠത്തോട് ഭയവും സംശയവുമാണെന്നും ഉന്നതനും സാധാരണക്കാരനും ഇവിടെ രണ്ട് നീതിയാണെന്നും ഭാഗ്യലക്ഷ്മി ആരോപിച്ചു.
‘നടിയെ ആക്രമിച്ച കേസിന്റെ വിധി തയ്യാറാണ്. ഇനി അത് പ്രഖ്യാപിക്കേണ്ട ദിവസമേയുള്ളൂ. ബാക്കിയെല്ലാം കഴിഞ്ഞു. ഇപ്പോള് നടക്കുന്നതെല്ലാം മറ്റുപല നാടകങ്ങളുമാണ്. കോടതിയില് പ്രോസിക്യൂട്ടര്മാര് അപമാനവും പരിഹാസവും നേരിടുകയാണ്. രണ്ട് പ്രോസിക്യൂട്ടര്മാര് മാറിയിട്ടും ജുഡീഷ്യറി കാരണം ചോദിക്കുന്നില്ല. എന്താണ് പ്രശ്നമെന്ന് ഒരു സാധാരണക്കാരനോടും കോടതി ചോദിക്കുന്നില്ല.
ഒരു സാധാരണക്കാരന് കോടതിയിലേക്ക് കയറിയാല് എന്തായിരിക്കും അവിടെ സംഭവിക്കുന്നത്. എന്റെ കേസില് ഞാന് തെറ്റ് ചെയ്തു എന്നരീതിയിലാണ് ജഡ്ജി എന്നോട് സംസാരിച്ചത്. പക്ഷേ, ഞാന് അതിനെ ബഹുമാനിക്കുന്നു. ഞാന് നിയമം കൈയിലെടുത്തത് കൊണ്ടാണ് കോടതി ആ വാക്ക് ചോദിച്ചത്. തീര്ച്ചയായും കോടതി അത് ചോദിക്കേണ്ടതാണ്. ഞാന് അതിനെ ബഹുമാനിക്കുന്നു.