യാത്രാ വിമാനത്തിന് നേരെ മയക്കുമരുന്ന് മാഫിയയുടെ കനത്ത വെടിവെപ്പ്; സീറ്റിനടിയില് ഒളിച്ച് യാത്രക്കാര്
മെക്സിക്കോ സിറ്റി: മയക്കുമരുന്ന് മാഫിയാ തലവന്റെ മകനെ കയറ്റിയ മെക്സിക്കന് എയര്ലൈന്സ് വിമാനത്തിനു നേരെ കനത്ത വെടിവെപ്പ്. മെക്സിക്കോയിലെ കുലിയാക്കന് വിമാനത്താവളത്തിലാണ് സംഭവം.
പറക്കാന് തയ്യാറായി നില്ക്കവെയാണ് വിമാനത്തിന് നേരെയാണ് വെടിവെപ്പ് ഉണ്ടായത്. എല് ചാപ്പോ ഉള്പ്പെട്ട ഗ്രൂപ്പായ സിനലോവ കാര്ട്ടലിന്റെ അംഗങ്ങളാണ് വിമാനത്തിനു നേരെ വെടിയുതിര്ത്തത് എന്നാണ് റിപ്പോര്ട്ടുകള്.
വിമാനത്തിനുള്ളിലുള്ളവര് വെടിവെപ്പിനെ തുടര്ന്ന് പരിഭ്രാന്തരായി. വെടിവെപ്പിനെ തുടര്ന്ന് വിമാന സര്വീസ് നിര്ത്തി വെച്ചു. വിമാനത്താവളം ഒരു ദിവസത്തേക്ക് അടച്ചുപൂട്ടുകയും ചെയ്തു. വിമാനത്തിനുള്ളില് നിന്നുള്ള ദൃശ്യങ്ങള് ഇപ്പോള് സോഷ്യല് മീഡിയയില് വൈറലാണ്. യാത്രക്കാര് എല്ലാവരും ഭയന്ന് നിലത്ത് സീറ്റുകള്ക്ക് അടിയില് ഇരിക്കുന്നതും ദൃശ്യങ്ങളില് കാണാം. കുഞ്ഞുങ്ങള് കരയുന്നതിന്റെയും ശബ്ദം കേള്ക്കാം.
മെക്സിക്കോയിലെ കുപ്രസിദ്ധ മയക്കുമരുന്ന് മാഫിയാ തലവന് ജോക്വിന് എല് ചാപ്പോ ഗുസ്മാന്റെ മകന് ഒവിഡിയോ ഗുസ്മാനെ കഴിഞ്ഞ ദിവസം പൊലീസ് പിടികൂടിയിരുന്നു. ഇയാളെ സിനാലോവയില്നിന്ന് മെക്സിക്കോ സിറ്റിയിലേക്ക് കൊണ്ടുപോവാനാണ് മെക്സിക്കന് എയര്ലൈനിന്റെ വിമാനത്തില് കയറ്റിയത്. ഈ വിമാനത്തിനു നേരെയാണ് വിമാനത്താവളത്തില് വെച്ച് മയക്കുമരുന്ന് മാഫിയ ആ്രകമണം നടത്തിയത്.
2016ല് എല് ചാപ്പോ അറസ്റ്റില് ആയപ്പോഴും വടക്കന് സംസ്ഥാനമായ സിനലോവയില് മാഫിയ സംഘങ്ങള് അക്രമം അഴിച്ചുവിട്ടിരുന്നു. ഇയാള് ഇപ്പോഴും ജയിലിലാണ്.