രാഷ്ട്രപതി തിരഞ്ഞെടുപ്പ് ജൂലൈ 18-ന്; രാംനാഥ് കോവിന്ദിന്റെ പിന്ഗാമി പട്ടികയിലേക്ക് അഞ്ചാളുടെ പേരുകൾ
ന്യൂഡല്ഹി: രാഷ്ട്രപതി തിരഞ്ഞെടുപ്പ് ജൂലൈ 18-ന് നടക്കുമെന്ന് കേന്ദ്ര തിരഞ്ഞെടുപ്പ് കമ്മിഷന്. തിരഞ്ഞെടുപ്പ് വിജ്ഞാപനം ജൂണ് 15-ന് പുറത്തിറക്കും. ജൂലൈ 21-ന് വോട്ടെണ്ണും. നിലവിലെ രാഷ്ട്രപതി രാംനാഥ് കോവിന്ദിന്റെ ഔദ്യോഗിക കാലാവധി ജൂലൈ 24-നാണ് അവസാനിക്കുക. ഇതിനു മുന്പ് പുതിയ രാഷ്ട്രപതിയെ തിരഞ്ഞെടുക്കുന്ന നടപടിക്രമങ്ങള് പൂര്ത്തിയാക്കേണ്ടതുണ്ട്. രാജ്യസഭാ സെക്രട്ടറി ജനറലാണ് തിരഞ്ഞെടുപ്പിന്റെ മുഖ്യവരണാധികാരി.
കേരളാ ഗവര്ണര് ആരിഫ് മുഹമ്മദ് ഖാന്, ഉപരാഷ്ട്രപതി വെങ്കയ്യ നായിഡു, പട്ടികവര്ഗ വിഭാഗത്തില്നിന്നുള്ള വനിതാ നേതാക്കളായ അനുസൂയ ഉയ്കെ, ദ്രൗപതി മുര്മു, കര്ണാടക ഗവര്ണര് തവാര്ചന്ദ് ഗഹലോത്ത് തുടങ്ങിയവരുടെ പേരുകള് ബിജെപിയുടെ പരിഗണനയിലുണ്ടെന്നാണ് സൂചന. നിലവില് ഛത്തീസ്ഗഢ് ഗവര്ണറാണ് അനുസൂയ. ദ്രൗപതി മുര്മു ജാര്ഖണ്ഡ് മുന്ഗവര്ണറും.