ഇറാന് മേലുള്ള ഉപരോധം ലംഘിച്ചു; ഗൾഫ് ഓഫ് ഒമാനിൽ എണ്ണക്കപ്പൽ ആക്രമിച്ച് തകർത്ത് അമേരിക്കൻ സൈന്യം

ഇറാനിലേക്കുള്ള നാവിക ഉപരോധം ലംഘിച്ച് അതിർത്തി കടക്കാൻ ശ്രമിച്ച എണ്ണക്കപ്പൽ അമേരിക്കൻ സൈന്യം ആക്രമിച്ച് തകർത്തു. ഗൾഫ് ഓഫ് ഒമാനിലെ അന്താരാഷ്ട്ര സമുദ്രപാതയിലൂടെ ഇറാനിയൻ തുറമുഖത്തേക്ക് പോകാൻ ശ്രമിച്ച പലാവു (Palau) പതാക വഹിച്ച ‘എം/ടി മാരിവെക്സ്’ (M/T Marivex) എന്ന കപ്പലിന് നേരെയാണ് യു.എസ് സെൻട്രൽ കമാൻഡിന്റെ (CENTCOM) നേതൃത്വത്തിൽ മിന്നലാക്രമണം നടത്തിയത്. ജൂൺ എട്ടിന് നടന്ന ഈ ഓപ്പറേഷനിൽ കപ്പലിന്റെ എൻജിൻ, സ്റ്റിയറിംഗ് സംവിധാനങ്ങൾ അമേരിക്കൻ യുദ്ധവിമാനം പ്രിസിഷൻ മിസൈൽ (precision munition) ഉപയോഗിച്ച് പൂർണ്ണമായും തകർക്കുകയായിരുന്നു. 
അമേരിക്കൻ നാവികസേന നൽകിയ മുന്നറിയിപ്പുകളും കർശന നിർദ്ദേശങ്ങളും കപ്പലിലെ ജീവനക്കാർ തുടർച്ചയായി അവഗണിച്ചതിനെ തുടർന്നാണ് സൈനിക നടപടിയിലേക്ക് കടന്നതെന്ന് സെൻട്രൽ കമാൻഡ് വ്യക്തമാക്കി. മേഖലയിൽ വിന്യസിച്ചിട്ടുള്ള യു.എസ്.എസ് എബ്രഹാം ലിങ്കൺ (USS Abraham Lincoln) വിമാനവാഹിനിക്കപ്പലിൽ നിന്നുള്ള എഫ്/എ-18 സൂപ്പർ ഹോർണെറ്റ് (F/A-18 Super Hornet) യുദ്ധവിമാനമാണ് കപ്പലിന് നേരെ കൃത്യമായ ആക്രമണം നടത്തിയത്. ആക്രമണ സമയത്ത് കപ്പലിൽ മറ്റ് ചരക്കുകൾ ഉണ്ടായിരുന്നില്ല. കപ്പലിലുണ്ടായിരുന്ന 24 ഇന്ത്യക്കാരായ ജീവനക്കാരെയും ഒമാൻ അധികൃതരുടെ സഹായത്തോടെ സുരക്ഷിതമായി രക്ഷപ്പെടുത്തിയിട്ടുണ്ട്. തകർന്ന കപ്പലിന് ഇനിയൊരു യാത്ര സാധ്യമല്ലെന്ന് സെൻട്രൽ കമാൻഡ് ഔദ്യോഗികമായി സ്ഥിരീകരിച്ചു. 

ഈ വർഷം ഏപ്രിലിൽ ഇറാന് മേൽ അമേരിക്ക ശക്തമായ നാവിക ഉപരോധം ഏർപ്പെടുത്തിയതിന് ശേഷം ഇത് ഏഴാമത്തെ കപ്പലാണ് നിർദ്ദേശങ്ങൾ ലംഘിച്ചതിന്റെ പേരിൽ അമേരിക്കൻ സൈന്യം തകർക്കുന്നത്. ഉപരോധം നിലവിൽ വന്നതിന് ശേഷം ഇതുവരെ മാനുഷിക സഹായങ്ങളുമായി വന്ന 42 കപ്പലുകൾക്ക് മാത്രമാണ് ഇറാനിലേക്ക് കടന്നുപോകാൻ അമേരിക്ക അനുമതി നൽകിയിട്ടുള്ളത്. മുന്നറിയിപ്പുകളെ തുടർന്ന് യു.എസ് നിർദ്ദേശങ്ങൾ പാലിച്ച 134 കപ്പലുകൾ ഇതിനോടകം തിരികെ അയച്ചതായും സൈന്യം അറിയിച്ചു. പശ്ചിമേഷ്യയിൽ ഇസ്രായേലും ഇറാനും തമ്മിൽ വലിയൊരു യുദ്ധത്തിന്റെ ഭീതി നിലനിൽക്കുന്ന സാഹചര്യത്തിലാണ് ഇറാന് മേലുള്ള സാമ്പത്തിക-നാവിക ഉപരോധങ്ങൾ അമേരിക്ക കൂടുതൽ കർശനമാക്കുന്നത്.