ക്ഷണം നിരസിച്ച് ലീഗ്, യുഡിഎഫിന്റെ അവിഭാജ്യഘടകം, സിപിഎം സെമിനാറില് പങ്കെടുക്കില്ല
മലപ്പുറം: ഏകസിവില് കോഡിനെതിരെ സിപിഎം നടത്തുന്ന സെമിനാറില് മുസ്ലിംലീഗ് പങ്കെടുക്കില്ലെന്ന് പാര്ട്ടി സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങള്.
യുഡിഎഫിന്റെ പ്രധാന ഘടകകക്ഷിയാണ് മുസ്ലിംലീഗ്. അതുകൊണ്ടുതന്നെ മുസ്ലിംലീഗിന് എല്ലാവരുമായും കൂടിച്ചേര്ന്ന് മാത്രമേ തീരുമാനമെടുക്കാൻ കഴിയൂവെന്നും സാദിഖലി തങ്ങള് പറഞ്ഞു. സെമിനാര് നടത്താനും പങ്കെടുക്കാനും സംഘടനകള്ക്ക് അവകാശമുണ്ടെന്നും തങ്ങള് പറഞ്ഞു. പാണക്കാട് ചേര്ന്ന യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
സിവില് കോഡിനെതിരെ എല്ലാവരും ഒരുമിച്ച് നില്ക്കണം. ഇത് മുസ്ലീം വിഷയം മാത്രം അല്ല. എല്ലാവരും ഏറ്റെടുക്കണം. ലീഗ് യുഡിഎഫിലെ പ്രധാന കക്ഷിയാണ്. അതുകൊണ്ടുതന്നെ ലീഗ് സെമിനാറില് പങ്കെടുക്കില്ല. കോണ്ഗ്രസിനെ മാറ്റി ഒന്നും ചെയ്യാനാകില്ല. കോണ്ഗ്രസിനെ മാറ്റി നിര്ത്തി സെമിനാറില് പങ്കെടുക്കില്ല. പങ്കെടുത്താല് ദോഷം ഉണ്ടാകും. ലീഗ് സിപിഎം സെമിനാറിന് പോകില്ല. ആര്ക്കും സെമിനാര് സംഘടിപ്പിക്കാം. ആര്ക്കും അതില് പങ്കെടുക്കാൻ സ്വാതന്ത്ര്യം ഉണ്ട്. സമസ്തക്കും അതിന്റെ സ്വാതന്ത്ര്യം ഉണ്ടെന്നും സാദിഖലി തങ്ങള് പറഞ്ഞു. ഇവിടുത്തെ സെമിനാറുകള് ഭിന്നിപ്പിക്കാൻ വേണ്ടി ആകരുതെന്ന് പികെ കുഞ്ഞാലിക്കുട്ടിയും പറഞ്ഞു. യോജിപ്പിനുള്ള സെമിനാര് ആണ് വേണ്ടത്. ബില്ല്
പരാജയപ്പെടാൻ കോണ്ഗ്രസ് ഇടപെടലുകള്ക്ക് മാത്രമേ കഴിയൂവെന്നും കുഞ്ഞാലിക്കുട്ടി പറഞ്ഞു.
സിപിഎം സെമിനാറില് പങ്കെടുക്കാനുള്ള സമസ്തയുടെ തീരുമാനവും ലീഗിനെ സമ്മര്ദ്ദത്തില് ആക്കിയിരുന്നു. ഇതും യോഗം ചര്ച്ച ചെയ്യും. സിവില് കോഡിനെതിരെ സ്വീകരിക്കേണ്ട രാഷ്ട്രീയ നിയമ തുടര് നടപടികളും യോഗത്തില് ചര്ച്ചയാകും. സിപിഎമ്മുമായി സഹകരിക്കുമെന്നും സെമിനാറില് പങ്കെടുക്കുമെന്നും സമസ്ത അധ്യക്ഷൻ ജിഫ്രി മുത്തുക്കോയ തങ്ങള് ഇന്നല പറഞ്ഞിരുന്നു.
ഏക സിവില് കോഡില് സമസ്ത പ്രധാനമന്ത്രിക്ക് നിവേദനം നല്കും. ശേഷം എന്ത് വേണമെന്ന് തീരുമാനിക്കും. കേരളത്തില് ഈ വിഷയത്തില് ആര് നല്ല പ്രവര്ത്തനം നടത്തിയാലും അവര്ക്കൊപ്പം നില്ക്കും. ഏത് രാഷ്ട്രീയ പാര്ട്ടികള്ക്കൊപ്പവും നില്ക്കും. പൗരത്വ വിഷയത്തില് സഹകരിച്ചത് പോലെ
കമ്മ്യൂണിസ്റ്റ് പാര്ട്ടിക്കൊപ്പവും നില്ക്കുമെന്നും ജിഫ്രി തങ്ങള് പറഞ്ഞിരുന്നു. മതത്തിൻ്റെ അടിസ്ഥാനത്തില് അല്ല, പാരസ്പര്യത്തിന്റെ അടിസ്ഥാനത്തിലാണ് രാജ്യം നിലനില്ക്കുന്നത്.
ഈ ലക്ഷ്യം വച്ച് പുലര്ത്തുന്ന ആരുമായും സഹകരിക്കുമെന്നാണ് സമസ്തയുടെ നിലപാട്. രാജ്യത്തിൻ്റെ നന്മകള്ക്ക് എതിരായ ചരിത്രം മുസ്ലിം സമുദായത്തിനില്ല. വികാരപരമായ എടുത്ത് ചാട്ടമല്ല വേണ്ടത്. ഓരോ മതസ്ഥര്ക്കും അവരുടെ ആചാരപ്രകാരം ജീവിക്കാൻ ഭരണ ഘടന സ്വാതന്ത്ര്യം നല്കുന്നുണ്ട്. മതം അനുശാസിക്കുന്ന മത നിയമങ്ങള് പാലിക്കപ്പെടണമെന്നും ജിഫ്രി തങ്ങള് കൂട്ടിച്ചേര്ത്തു.