കണ്ണൂരിൽ ടൂറിസ്റ്റ്ബസ്സും ലോറിയും കൂട്ടിയിടിച്ച് അപകടം; ഒരാൾ മരിച്ചു, 27 പേർക്ക് പരിക്ക്
തോട്ടട: ദേശീയപാതയിൽ തോട്ടട ടൗണിൽ ടൂറിസ്റ്റ് ബസ്സും മിനി കൺടെയ്നർ ലോറിയും കൂട്ടിയിടിച്ച് ബസ്യാത്രക്കാരൻ മരിച്ചു. 27 പേർക്ക് പരിക്കേറ്റു. ഇവരെ വിവിധ സ്വകാര്യ ആസ്പത്രികളിൽ പ്രവേശിപ്പിച്ചു. രണ്ടുപേരുടെ പരിക്ക് ഗുരുതരമാണ്. അപകടത്തിൽ മരിച്ച ആളുടെ തല വേർപെട്ടു. ആളെ തിരിച്ചറിഞ്ഞിട്ടില്ല. മൃതദേഹം കണ്ണൂർ ജില്ലാ ആസ്പത്രിമോർച്ചറിയിലേക്ക് മാറ്റി. ചൊവ്വാഴ്ച പുലർച്ചെ 12.45-ഓടെയാണ് അപകടം. മണിപ്പാലിൽനിന്ന് പത്തനംതിട്ടയിലേക്ക് പോകുകയായിരുന്ന കല്ലട ട്രാവൽസിന്റെ ടൂറിസ്റ്റ് ബസ്സും തലശ്ശേരിയിൽനിന്ന് കണ്ണൂർ ഭാഗത്തേക്ക് പോ കുകയായിരുന്ന മിനി കൺടെയ്നർ ലോറിയുമാണ് കൂട്ടിയിടിച്ചത്. ലോറി ആന്ധ്രപ്രദേശ് രജിസ്ട്രേഷനുള്ളതാണ്. ഇടിയുടെ ആഘാതത്തിൽ ബസ് റോഡിനു കുറുകെ വീണ് ഗതാഗതം തടസ്സപ്പെട്ടു. ലോറി ഇടിച്ചുകയറി സമീപത്തെ കട തകർന്നു. പോലീസും അഗ്നിരക്ഷാസേനയും എത്തി ക്രെയിൻ ഉപയോ ഗിച്ച് ബസ് റോഡിൽ നിന്ന് മാറ്റി രണ്ടരയോടെ ഗതാഗതം പുനഃസ്ഥാപിച്ചു. നാട്ടുകാരും രക്ഷാപ്രവർത്തനത്തിൽ ഏർപ്പെട്ടു. ബസ്സിന്റെ അമിതവേഗമാണ് അപകടത്തിനിടയാക്കിയതെന്ന് ബസ് യാത്രക്കാരൻ പറഞ്ഞു.