ബിൽക്കീസ് ബാനോ കൂട്ടബലാത്സംഗ കേസ്: രണ്ടു പ്രതികളുടെ ശിക്ഷ മരവിപ്പിച്ച് സുപ്രീം കോടതി

ന്യൂഡൽഹി: ബിൽക്കീസ് ബാനോ കൂട്ടബലാത്സംഗ– കൊലപാതക കേസുകളിൽ ജീവപര്യന്തം തടവിനു ശിക്ഷിച്ച രണ്ടു പ്രതികളുടെ ശിക്ഷ മരവിപ്പിച്ച സുപ്രീം കോടതി ഇരുവർക്കും ജാമ്യം അനുവദിച്ചു. പ്രതികളായ ബിപിൻചന്ദ് ജോഷി, പ്രദീപ് മോധിയ എന്നിവർക്ക് ഇതിനകം 17 വർഷത്തിലധികം ജയിൽവാസം അനുഭവിച്ചെന്നും, ഇവരുടെ അപ്പീലിൽ വസ്തുതാപരവും നിയമപരവുമായ നിരവധി വിഷയങ്ങൾ പരിശോധിക്കേണ്ടതുണ്ടെന്നതും കണക്കിലെടുത്താണ് സുപ്രീം കോടതിയുടെ നടപടി. പ്രതികളുടെ ജീവപര്യന്തം തടവ് ശരിവച്ച 2017ലെ ബോംബെ ഹൈക്കോടതി വിധി ചോദ്യം ചെയ്ത് സമർപ്പിച്ച് ഹർജിയിലാണ് സുപ്രീം കോടതിയുടെ വിധി.
ഹർജിക്കാരിലൊരാളായ ബിപിൻചന്ദ് ജോഷി ഗുരുതരമായ ശാരീരിക വൈകല്യമുള്ള വ്യക്തിയാണെന്ന കാര്യവും ബെഞ്ച് പ്രത്യേകം പരിഗണിച്ചു. കുറ്റകൃത്യത്തിന്റെ ഗൗരവവും വിചാരണ കോടതിയുടെയും ഹൈക്കോടതിയുടെയും ഒരേപോലെയുള്ള കണ്ടെത്തലുകളും ചൂണ്ടിക്കാട്ടി സർക്കാർ അഭിഭാഷകൻ ജാമ്യാപേക്ഷയെ ശക്തമായി എതിർത്തു. എന്നാൽ, പ്രതികളിലൊരാളുടെ പേര് ആദ്യം രജിസ്റ്റർ ചെയ്ത എഫ്ഐആറിൽ ഉണ്ടായിരുന്നില്ലെന്നും സംഭവം നടന്ന് ഏകദേശം മൂന്നു വർഷത്തിനു ശേഷമാണ് ഇയാളെ കേസിൽ പ്രതിയാക്കിയതെന്നും പ്രതിഭാഗം അഭിഭാഷകൻ വാദിച്ചു. ഈ വർഷം മാർച്ചിൽ ഇവരുടെ ഹർജിയിൽ സുപ്രീം കോടതി നോട്ടിസ് അയച്ചിരുന്നു.
ബലാത്സംഗ ആരോപണവുമായി ബന്ധപ്പെട്ട് അതിജീവിത പോലീസിന് നൽകിയ മൊഴിയിലോ വൈദ്യപരിശോധനയ്ക്കിടെ ഡോക്ടർക്ക് മുന്നിൽ നൽകിയ മൊഴിയിലോ ഈ രണ്ട് ഹർജിക്കാരുടെയും പേരുകൾ പരാമർശിച്ചിട്ടില്ലെന്ന് നേരത്തെ പ്രതിഭാഗം ചൂണ്ടിക്കാട്ടിയിരുന്നു. ഇരുവർക്കുമെതിരെ പ്രത്യക്ഷത്തിലുള്ള കുറ്റകൃത്യങ്ങളൊന്നും ആരോപിക്കപ്പെട്ടിട്ടില്ലെന്നും, സംഭവസമയത്ത് ജനക്കൂട്ടത്തിൽ ഇവരുടെ സാന്നിധ്യമുണ്ടായിരുന്നിരിക്കാം എന്നതു മാത്രമാണ് ഇവർക്കെതിരായ ഏക തെളിവെന്നും അഭിഭാഷകൻ വാദിച്ചു.
ബിൽക്കിസ് ബാനു കേസിൽ ഗുജറാത്ത് സർക്കാർ ശിക്ഷായിളവു നൽകി നേരത്തെ ജയിൽ മോചിതരാക്കിയ 11 പ്രതികളിൽ ഉൾപ്പെട്ടവരാണ് ഇരുവരും. 2024 ജനുവരിയിൽ സുപ്രീം കോടതി ഈ ശിക്ഷാ ഇളവ് റദ്ദാക്കിയിരുന്നു. ബിൽക്കിസ് ബാനു നൽകിയ ഹർജി പരിഗണിച്ച കോടതി, പ്രതികൾക്ക് ശിക്ഷാ ഇളവ് നൽകാൻ ഗുജറാത്ത് സർക്കാരിന് അധികാരമില്ലെന്ന് വ്യക്തമാക്കുകയും രണ്ടാഴ്ചയ്ക്കകം 11 പ്രതികളും കീഴടങ്ങാൻ ഉത്തരവിടുകയുമായിരുന്നു. തുടർന്ന് ഇവർ വീണ്ടും ജയിലിലേക്ക് മടങ്ങിയിരുന്നു.
2002ലെ ഗുജറാത്ത് കലാപത്തിനിടെ 21 വയസ്സുള്ളപ്പോഴാണ് അഞ്ചു മാസം ഗർഭിണിയായിരുന്ന ബിൽക്കീസ് ബാനു ക്രൂരമായ കൂട്ടബലാത്സംഗത്തിന് ഇരയായത്. അന്ന് അവരുടെ മൂന്ന് വയസ്സുള്ള മകൾ ഉൾപ്പെടെ കുടുംബത്തിലെ ഏഴു പേരെ അക്രമികൾ കൊലപ്പെടുത്തിയിരുന്നു.

