സംസ്ഥാനത്ത് പോപ്പുലര് ഫ്രണ്ട് കേന്ദ്രങ്ങളില് NIA റെയ്ഡ്; 13 നേതാക്കള് കസ്റ്റഡിയില്
കൊച്ചി: രാജ്യവ്യാപകമായി പോപ്പുലര് ഫ്രണ്ട് ഓഫീസുകളിലും നേതാക്കളുടെ വീടുകളിലും ദേശീയ അന്വേഷണ ഏജന്സി (എന്.ഐ.എ)യുടെ റെയ്ഡ്. സംസ്ഥാനത്തെ വിവിധ ജില്ലകളില് ബുധനാഴ്ച അര്ധരാത്രിയോടെയാണ് എന്ഐഎ ഉദ്യോഗസ്ഥര് റെയ്ഡിനായി എത്തിയത്. പുലര്ച്ചെ വരെ റെയ്ഡ് തുടര്ന്നു. പലസ്ഥലത്തും രാവിലെയും റെയ്ഡ് തുടരുകയാണ്. സംസ്ഥാനത്തു നിന്ന് 13 പോപ്പുലര് ഫ്രണ്ട് നേതാക്കളെ കസ്റ്റഡിയിലെടുത്തിട്ടുണ്ട്. സിആര്പിഎഫ് സുരക്ഷയോടെ ആയിരുന്നു റെയ്ഡ്. സംസ്ഥാനത്ത് പലസ്ഥലത്തും പോപ്പുലര് ഫ്രണ്ടിന്റെ പ്രാദേശിക നേതാക്കളും പ്രവര്ത്തകരും പ്രതിഷേധവുമായി രംഗത്തെത്തി. തിരുവനന്തപുരം, കൊല്ലം, പത്തനംതിട്ട, കോട്ടയം, തൃശ്ശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര് ജില്ലകളില് റെയ്ഡ് നടന്നു.