സഹോദരനെ കുഴിച്ച് മൂടിയത് ജീവനോടെ, തൃശൂരിലെ കൊലപാതകത്തില് നിര്ണായകമായി പോസ്റ്റ്മോര്ട്ടം റിപ്പോര്ട്ട്
തൃശൂര്: ചേര്പ്പ് മുത്തുള്ളിയാലില് യുവാവിനെ സഹോദരന് (Brother)കുഴിച്ച് മൂടിയത് ജീവനോടെയെന്ന് ( Buried alive) കണ്ടെത്തല്. ചേര്പ്പ് സ്വദേശി കെ.ജെ. ബാബുവിന്റെ കൊലപാതകത്തിലെ (Babu Murder) നിര്ണായക വിവരങ്ങളാണ് പോസ്റ്റ് മോര്ട്ടം റിപ്പോര്ട്ടിലൂടെ പുറത്ത് വന്നത്. ബാബുവിന്റെ ശ്വാസകോശത്തില് മണ്ണിന്റെ അംശം പോസ്റ്റ്മോര്ട്ടത്തില് കണ്ടെത്തി. ജീവനോടെ കുഴിച്ച് മൂടിയാല് മാത്രമേ ശ്വാസകോശത്തില് മണ്ണിന്റെ സാന്നിധ്യമുണ്ടാകൂ. ആ സ്ഥിതിക്ക് ജീവനോടെയാകാം ബാബുവിനെ സാബു കുഴിച്ച് മൂടിയതെന്നാണ് നിഗമനം. തലയില് ആഴത്തിലുള്ള മുറിവും കണ്ടെത്തിയിട്ടുണ്ട്.
മദ്യപിച്ചെത്തി സ്ഥിരം ബഹളമുണ്ടാക്കുന്ന സഹോദരനെ കഴുത്തുഞെരിച്ച് കൊലപ്പെടുത്തിയ ശേഷം കുഴിച്ചുമൂടിയെന്നായിരുന്നു പ്രതിയായ സഹോദരന് സാബുവിന്റെ മൊഴി. എന്നാല് കഴുത്ത് ഞെരിച്ചപ്പോള് അബോധാവസ്ഥയിലായ ബാബു മരിച്ചെന്ന് കരുതി സഹോദരന് സാബു കുഴിച്ച് മൂടിയതാകാമെന്നുമാണ് പൊലീസിന്റെ ഇപ്പോഴത്തെ വിലയിരുത്തല്.
ഈ മാസം 19ന് അര്ദ്ധരാത്രിയിലാണ് സംഭവം നടന്നത്. ശേഷം മൃതദേഹം വീടിന്റെ അടുത്തുള്ള പറമ്ബില് കുഴിച്ചുമൂടുകയായിരുന്നു. ബാബുവിനെ കാണാനില്ലെന്ന് കാണിച്ച് രണ്ടു ദിവസം മുമ്ബ് മാതാപിതാക്കള് പൊലീസില് പരാതി നല്കിയിരുന്നു. തുടര്ന്ന് ആളൊഴിഞ്ഞ പറമ്ബില് മൃതദേഹത്തിന്റെ കൈ പുറത്തു കണ്ട നാട്ടുകാരാണ് വിവരം പൊലീസിനെ അറിയിച്ചത്.
തൃശ്ശൂരില് കാണാതായ യുവാവിന്റെ മൃതദേഹം കണ്ടെത്തിയ സംഭവം; കൊലപ്പെടുത്തിയത് സഹോദരന് തന്നെ, കേസില് വഴിത്തിരിവ്
രാവിലെ പശുവിനെ കെട്ടാനെത്തിയ രണ്ടു പേരാണ് ആളൊഴിഞ്ഞ പറമ്ബില് മൃതദേഹം കണ്ടെത്തിയത്. പറമ്ബിലെ ഒരു ഭാഗത്ത് മണ്ണ് ഇളകിയ നിലയിലായിരുന്നു. നാട്ടുകാരെ വിളിച്ചു തിരികെ വന്നപ്പോള് നേരത്തെ മാറി കിടന്ന മണ്ണ് തിരികെ ഇട്ടതായി കണ്ടു. സംശയം തോന്നിയ നാട്ടുകാര് മണ്ണ് മാറ്റി നോക്കിയപ്പോള് മണ്ണിനടിയില് ഹോളോ ബ്രിക്സ് കട്ടകള് നിരത്തിയതായി കണ്ടെത്തി. കട്ടകള് മാറ്റിനോക്കിയപ്പോഴാണ് മൃതദേഹത്തിന്റെ കൈ കണ്ടത്. ഈ കയ്യില് ബാബു എന്ന് പച്ചകുത്തിയിരുന്നു. ഉടന് ഇവര് ചേര്പ്പ് പൊലീസില് വിവരമറിയിച്ചു.
പൊലീസ് സ്ഥലത്തെത്തി വീട്ടുകാരുമായി സംസാരിച്ചപ്പോളാണ് സഹോദരന് സാബുവിന്റെ പെരുമാറ്റത്തില് ചില സംശയം തോന്നിയത്. സാബുവിനെ കൂടുതല് ചോദ്യം ചെയ്തപ്പോഴാണ് സംഭവത്തിന്റെ ചുരുളഴിയുന്നത്. മദൃപ്പിച്ചെത്തുന്ന ബാബു വീട്ടില് നിരന്തരം പ്രശ്നങ്ങള് ഉണ്ടാക്കുമായിരുന്നു. സഹികെട്ട് ബാബുവിനെ കഴുത്ത് ഞെരിച്ച് കൊലപ്പെടുത്തുകയായിരുന്നുവെന്ന് സാബു മൊഴി നല്കി. ശേഷം മൃതദേഹം വീടിന്റെ 300 മീറ്റര് അടുത്തുള്ള പറമ്ബില് കുഴിച്ചുമൂടുകയായിരുന്നുവെന്നും വെളിപ്പെടുത്തി.