ടിക് ടോക്കിലൂടെ പ്രണയം ; ഒരുമിച്ച് കഴിഞ്ഞ രണ്ട് പെൺകുട്ടികളിൽ ഒരാളെ കേരള പോലീസ് ബലം പ്രയോഗിച്ച് കൊണ്ടുപോയതായി പരാതി
ചെന്നൈ: ഒരുമിച്ച് ജീവിക്കുകയായിരുന്ന രണ്ട് പെണ്‍കുട്ടികളില്‍ ഒരാളെ കേരള പൊലീസ് ബലം പ്രയോഗിച്ച് നാട്ടിലേക്ക് കൊണ്ടുപോയതായി പരാതി. കോഴിക്കോട് സ്വദേശിനിയായ 21കാരിയെ സമ്മതം ഇല്ലാതെ പൊലീസ് പിടിച്ചുകൊണ്ടുപോയെന്നാണ് പരാതി ഉയര്‍ന്നത്. ടിക്ക് ടോക്കിലൂടെ പരിചയപ്പെട്ടാണ് പെണ്‍കുട്ടികള്‍ ഒരുമിച്ച് ജീവിക്കാന്‍ തുടങ്ങിയത്.
രക്ഷിതാക്കള്‍ നല്‍കിയ പരാതിയെ തുടര്‍ന്നാണ് പെണ്‍കുട്ടിയെ തിരികെ കൊണ്ടുവന്നത് എന്നാണ് പൊലീസിന്റെ വിശദീകരണം. കോഴിക്കോട് കൊടുവള്ളിയിലെ ലാബ് അസിസ്റ്റന്‍ഡായ പെണ്‍കുട്ടി ടിക് ടോക്കിലൂടെയാണ് ചെന്നൈ സ്വദേശിനിയായ 22 കാരിയെ പരിചയപ്പെടുന്നത്. ടിക് ടോക്കിലൂടെ തുടങ്ങിയ സൗഹൃദം പിന്നീട് പ്രണയമായി. വീട്ടുകാര്‍ എതിര്‍ത്തതോടെ ചെന്നൈ സ്വദേശിനിക്കൊപ്പം ഒളിച്ചോടി.
കൊവിഡ് നിയന്ത്രണങ്ങള്‍ക്കിടെ ചെന്നൈയില്‍ നിന്ന് കാറില്‍ കോഴിക്കോട് എത്തിയാണ് പെണ്‍കുട്ടിയെ കൂട്ടികൊണ്ടുപോയത്. നുംഗമ്ബാക്കത്തെ വസതിയില്‍ ചെന്നൈ സ്വദേശിനിയുടെ അമ്മയ്ക്കൊപ്പമായിരുന്നു ഇരുവരും കഴിഞ്ഞിരുന്നത്. ബിരുദ വിദ്യാര്‍ത്ഥിയാണ് ചെന്നൈ സ്വദേശിനി. പെണ്‍കുട്ടിയെ കാണാനില്ലെന്ന പരാതിയുമായി രക്ഷിതാക്കള്‍ പൊലീസിനെ സമീപിക്കുകയായിരുന്നു. തുടര്‍ന്ന് നടത്തിയ അന്വേഷണമാണ് ടിക്ക് ടോക്കിലേക്കും ചെന്നൈയിലേക്കും എത്തിയത്.
എന്നാല്‍ പെണ്‍കുട്ടിയുടെ സമ്മതം ഇല്ലാതെ ബലം പ്രയോഗിച്ച് പൊലീസ് പിടിച്ചുകൊണ്ടുപോവുകയായിരുന്നു എന്ന് ചെന്നൈ സ്വദേശിനി ആരോപിച്ചു. പെണ്‍കുട്ടിയെ ബലം പ്രയോഗിച്ചാണ് കൊണ്ട് പോയതെന്ന് ചൂണ്ടിക്കാട്ടി നുഗമ്ബാക്കം പൊലീസില്‍ പരാതി നല്‍കി. പെണ്‍കുട്ടിയെ താമരശ്ശേരി മജിസ്ട്രേറ്റ് മുമ്ബാകെ ഹാജരാക്കുമെന്ന് പൊലീസ് അറിയിച്ചു. എന്നാല്‍ പെണ്‍കുട്ടിയെ തന്നില്‍ നിന്ന് അകറ്റാന്‍ സദാചാര പൊലീസ് ചമയുകയാണ് കേരള പൊലീസെന്ന് ചെന്നൈ സ്വദേശിനി ആരോപിച്ചു.