ബംഗ്ലാദേശിനെ ചുരുട്ടിക്കൂട്ടി അഫ്ഗാനിസ്ഥാനും; ഒന്നാം ഏകദിനത്തില്‍ വൻ വിജയം
ബംഗ്ലാദേശിനെതിരായ ആദ്യ ഏകദിന മത്സരത്തില്‍ ഉജ്ജ്വല വിജയം സ്വന്തമാക്കി അഫ്ഗാനിസ്ഥാൻ. 92 റണ്‍സിന്റെ കൂറ്റൻ വിജയമാണ് അഫ്ഗാനിസ്ഥാൻ സ്വന്തമാക്കിയത്.
ആദ്യം ബാറ്റ് ചെയ്ത അഫ്ഗാനിസ്ഥാൻ 49.4 ഓവറില്‍ 235 റണ്‍സെടുത്തു. മറുപടി ബാറ്റിങ്ങിനിറങ്ങിയ ബംഗ്ലാദേശിന് 34.3 ഓവറില്‍ 143 റണ്‍സ് എടുക്കാനെ സാധിച്ചുള്ളു.
ടോസ് നേടിയ അഫ്ഗാനിസ്ഥാൻ ബാറ്റിങ് തെരഞ്ഞെടുക്കുകയായിരുന്നു. എന്നാല്‍ തുടക്കം അടിപതറിയ അറ്ഗാനിസ്ഥാന് 71 റണ്‍സെടുക്കുന്നതിനിടെ 5 വിക്കറ്റ് നഷ്ടമായി. ആറാം വിക്കറ്റില്‍ നായകൻ ഹസമത്തുള്ള ഷാഹിദിയും മുഹമ്മദ് നബിയും ചേർന്നു നടത്തിയ രക്ഷാപ്രവർത്തനത്തിലാണ് ഭേദപ്പെട്ട സ്കോറിലേക്കെത്താൻ അഫ്ഗാനിസ്ഥാന് കഴിഞ്ഞത്.
ആറാം വിക്കറ്റില്‍ 104 റണ്‍സിന്റെ കൂട്ടുകെട്ടുയ‍ർത്തിയ സഖ്യത്തില്‍ ഷാഹിദി 52 റണ്‍സും നബി 84 റണ്‍സും നേടി. ബംഗ്ലാദേശിനു വേണ്ടി ടസ്കിൻ അഹമ്മദും മുസ്തഫിസൂർ റഹ്മാനും നാല് വിക്കറ്റുകള്‍ വീതം വീഴ്ത്തി.
മറുപടി ബാറ്റിങ്ങിനിറങ്ങിയ ബംഗ്ലാദേശ് രണ്ടിന് 120 എന്ന ശക്തമായ നിലയിലെത്തി. നജ്മുള്‍ ഹൊസൈൻ ഷാൻ 47 റണ്‍സും. സൗമ്യ സർക്കാർ 33 റണ്‍സും, മെഹിദി ഹസൻ മിറാസ് 28 റണ്‍സുമെടുത്തു. ശക്തമായ നിലയില്‍ നിന്ന് 23 റണ്‍സിനിടെ ബംഗ്ലാദേശ് എട്ട് വിക്കറ്റുകള്‍ വലിച്ചെറിഞ്ഞതോടെയാണ് 143 റണ്‍സില്‍ ബംഗ്ലാദേശിന്റെ പോരാട്ടം അവസാനിച്ചു.