പാകിസ്താനികളെ കണ്ടെത്തി നാടുകടത്തുക; മുഖ്യമന്ത്രിമാര്ക്ക് നിര്ദേശം നല്കി അമിത് ഷാ
ന്യൂഡല്ഹി: പാകിസ്താന് പൗരന്മാരെ ഉടന് കണ്ടെത്തി തിരിച്ചയക്കാന് കേന്ദ്ര ആഭ്യന്തര മന്ത്രി അമിത് ഷാ എല്ലാ മുഖ്യമന്ത്രിമാർക്കും നിര്ദ്ദേശം നല്കി. പഹല്ഗാം ഭീകരാക്രമണത്തെത്തുടര്ന്ന് പാകിസ്താന് പൗരന്മാര്ക്കുള്ള എല്ലാ വിസകളും റദ്ദാക്കിയ കേന്ദ്ര സര്ക്കാര് നടപടിക്ക് പിന്നാലെയാണ് ആഭ്യന്തര മന്ത്രിയുടെ നിര്ദേശം.
എല്ലാം സംസ്ഥാനങ്ങളിലുമുള്ള പാകിസ്താന് പൗരന്മാരെ കണ്ടെത്തി ഉടന് നാടുകടത്താനാണ് നിര്ദേശം.
പഹല്ഗാം ഭീകരാക്രമണത്തിന്റെ പശ്ചാത്തലത്തില് ഇന്ത്യയിലുള്ള പാകിസ്താന് പൗരന്മാരോട് ഏപ്രില് 27-നകം ഇന്ത്യ വിടാനാണ് കേന്ദ്ര സര്ക്കാര് ആവശ്യപ്പെട്ടിരിക്കുന്നത്. മെഡിക്കല് വിസയുള്ള പാക് പൗരന്മാര്ക്ക് രണ്ട് ദിവസം കൂടി അധികമായി ലഭിക്കും. ഇവര് ഏപ്രില് 29-നകം രാജ്യം വിടേണ്ടിവരുമെന്നാണ് കേന്ദ്രം വ്യക്തമാക്കിയിരിക്കുന്നത്.
നയതന്ത്ര നടപടികളുടെ ഭാഗമായി പാക് പൗരന്മാര്ക്ക് പുതുതായി വിസ നല്കുന്നതും ഇന്ത്യ നിര്ത്തിവെച്ചിട്ടുണ്ട്. നിലവിലുള്ള വിസകൾ റദ്ദാക്കുകയും ചെയ്തു. കൂടാതെ ഇന്ത്യക്കാര് പാകിസ്താനിലേക്ക് യാത്ര ചെയ്യരുതെന്നും കേന്ദ്ര സര്ക്കാര് നിര്ദേശം നല്കിയിട്ടുണ്ട്.
ഭീകരാക്രമണത്തിനുപിന്നാലെയുള്ള സംഭവവികാസങ്ങളുടെ തുടര്ച്ചയായി ഇന്ത്യയുമായുള്ള 1972-ലെ ഷിംല കരാര് പാകിസ്താന് മരവിപ്പിക്കുകയും ചെയ്തിരുന്നു. ഇന്ത്യയില്നിന്നുള്ള വിമാനങ്ങള്ക്ക് പ്രവേശനാനുമതി നിഷേധിച്ചുകൊണ്ട് പാക് വ്യോമമേഖല അടയ്ക്കുകയും ചെയ്തു.