കൊച്ചിയില്‍ വീണ്ടും അമീബിക് മസ്തിഷ്ക ജ്വരം: രോഗം സ്ഥിരീകരിച്ചത് ലക്ഷദ്വീപ് സ്വദേശിക്ക്
എറണാകുളം: സംസ്ഥാനത്ത് വീണ്ടും അമീബിക് മസ്തിഷ്ക ജ്വരം സ്ഥിരീകരിച്ചു. കൊച്ചിയിലാണ് രോഗം സ്ഥിരീകരിച്ചത്. ഇടപ്പള്ളിയില്‍ ജോലി ചെയ്യുന്ന ലക്ഷദ്വീപ് സ്വദേശിക്കാണ് മസ്തിഷ്ക ജ്വരം ബാധിച്ചത്.
നിലവില്‍ സ്വകാര്യ ആശുപത്രിയിലാണ് രോഗി. ഇയാളുടെ ആരോഗ്യനിലയില്‍ ആശങ്കപ്പെടേണ്ടതില്ലെന്ന് ആരോഗ്യവകുപ്പ് അറിയിച്ചത്.
സംസ്ഥാനത്ത് ഇതുവരെ 153 പേർക്ക് മസ്തിഷ്ക ജ്വരം ബാധിച്ചിട്ടുണ്ട്. 33 മരണങ്ങളും ഇതുവരെ റിപ്പോർട്ട് ചെയ്തു. മസ്തിഷ്ക ജ്വരം റിപ്പോർട്ട് ചെയ്യുന്ന സാഹചര്യത്തില്‍ ആരോഗ്യവകുപ്പ് വേണ്ട നടപടികള്‍ സ്വീകരിച്ചുവരികയാണ്.
നേഗ്ലെറിയ ഫൗലേറി, അക്കാന്തമീബ, സാപ്പിനിയ, ബാലമുത്തിയ വെര്‍മമീബ എന്നീ അമീബ വിഭാഗത്തില്‍പ്പെട്ട രോഗാണുക്കള്‍ തലച്ചോറിനെ ബാധിക്കുന്നതാണ് അമീബിക് മസ്തിഷ്ക ജ്വരം. രോഗത്തിന്റെ ഉറവിടം കണ്ടെത്താൻ സാധിക്കാത്തത് ആശങ്ക വർദ്ധിപ്പിക്കുന്നു.