കുമ്പള ടോൾ, താത്കാലികാശ്വാസം: ഹൈക്കോടതിയിലെ കേസിൽ 14-ന് ഹിയറിങ് നടക്കുംവരെ ടോൾ പിരിക്കില്ല; ഹൈക്കോടതിയും തങ്ങൾക്കനുകൂലമായി വിധിക്കുമെന്ന പ്രതീക്ഷയിലാണിപ്പോൾ പ്രദേശവാസികൾ

കുമ്പള: പ്രതിഷേധങ്ങൾ തുടരുന്നതിനിടെയാണ് ആരിക്കാടിയിൽ ടോൾ പിരിക്കാനുള്ള നീക്കം ദേശീയപാതാ അതോറിറ്റി അധികൃതർ തുടങ്ങിയത്. പത്രപരസ്യത്തിനൊപ്പം നാട്ടുകാരും ആശങ്കയിലായി. പ്രതിഷേധ പ്രസ്താവനകൾ പിന്നാലെ വന്നു. നാട്ടുകാരിലും അമർഷം. കർമസമിതി നേതാവ് എ.കെ.എം. അഷ്റഫ് എംഎൽഎ ഒടുവിൽ കളക്ടറെയും പോലീസ് മേധാവിയെയും നേരിൽ കണ്ടു. സമരം ചെയ്യുമെന്നും ഏത് കേസ് വന്നാലും നേരിടുമെന്നും അറിയിച്ചു. കാര്യം കൈവിട്ടുപോകാതിരിക്കാനായി പിന്നെയുള്ള ഇടപെടൽ. ഒടുവിൽ തീരുമാനം വന്നു. ഹൈക്കോടതിയിലെ കേസിൽ 14-ന് ഹിയറിങ് നടക്കുംവരെ ടോൾ പിരിക്കില്ല. താത്കാലികാശ്വാസം. ഹൈക്കോടതിയും തങ്ങൾക്കനുകൂലമായി വിധിക്കുമെന്ന പ്രതീക്ഷയിലാണിപ്പോൾ പ്രദേശവാസികൾ.

പ്രതിഷേധത്തിന്റെ നാൾവഴികളിൽ കല്ലും മുള്ളും

നാലുമാസം മുൻപ് ദേശീയപാത ആരിക്കാടിയിൽ ടോൾ പ്ലാസ വരുന്നുവെന്ന വാർത്ത പരന്നപ്പോൾ ആരും അതത്ര കാര്യമായെടുത്തിരുന്നില്ല. ഊരാളുങ്കൽ ലേബർ കോൺട്രാക്ട് കോഓപ്പറേറ്റിവ് സൊസൈറ്റി (യുഎൽസിസിഎസ്) തൊഴിലാളികൾ നിർമാണം തുടങ്ങിയപ്പോൾ യുവാക്കളുടെയിടയിൽ ടോൾഗേറ്റ് ചർച്ചയായി. ആരിക്കാടി കടവത്തെ ഏതാനും യുവാക്കൾ നിർമാണത്തിനെതിരേ പ്രതിഷേധിച്ചു.

തുടർന്ന് വാട്‌സാപ്പ് കൂട്ടായ്മയുണ്ടാക്കി. ദിവസങ്ങൾക്കുള്ളിൽ ആയിരങ്ങൾ കൂട്ടായ്മയിൽ അംഗങ്ങളായി. ജനകീയ പിന്തുണയേറിയപ്പോൾ രാഷ്ട്രീയപ്പാർട്ടി നേതൃത്വം പിന്തുണയുമായെത്തി. എംപിയെയും എംഎൽഎമാരെയും പങ്കെടുപ്പിച്ച് ജനകീയമാർച്ച് നടന്നു. നിർമാണപ്രവൃത്തി തടഞ്ഞു. 160-ഓളം ആളുകളുടെ പേരിൽ കേസായി. ഇതോടൊപ്പം നിയമപോരാട്ടവും തുടർന്നു.

ആദ്യഘട്ടത്തിൽ അഞ്ച് ഹർജികൾ നിർമാണം തടയാനാവശ്യപ്പെട്ട് രാഷ്ട്രീയ പാർട്ടികളും, കർമസമിതിയും നൽകി. എല്ലാ ഹർജികളും ഹൈക്കോടതി സിംഗിൾ ബെഞ്ച് തള്ളി. തുടർന്നാണ് കർമസമിതി അപ്പീൽ നൽകിയത്. അപ്പീൽ പരിഗണിച്ച ഹൈക്കോടതി ദേശീയപാത അധികൃതരോട്‌ സത്യവാങ്മൂലം നൽകാൻ ആവശ്യപ്പെട്ടു. ഹൈക്കോടതി നടപടികൾ നീണ്ടുപോവുകയും ഹർജി ബുധനാഴ്ച പരിഗണിക്കാനിരിക്കുമ്പോഴാണ് ടോൾ പിരിവ് അറിയിപ്പുമായി ദേശീയപാത അധികൃതർ മുന്നോട്ടുവന്നത്.

ചൊവ്വാഴ്ച ടോൾപിരിവ് അറിയിപ്പുമായി മുന്നോട്ടുവന്ന ദേശീയപാത അധികൃതരുടെ നീക്കങ്ങൾക്കെതിരെയായ സമരപരിപാടി ആലോചിക്കുന്നതിന് കർമസമിതി ചെയർമാൻ കൂടിയായ എ.കെ.എം. അഷ്റഫ് എംഎൽഎയുടെ നേതൃത്വത്തിൽ കുമ്പളയിൽ യോഗം ചേർന്നിരുന്നു. യോഗത്തിൽ എംഎൽഎ അധ്യക്ഷനായി. അഷ്റഫ് കർള, എ.കെ. ആരിഫ്, ലക്ഷ്മണ പ്രഭു, ഫാറൂഖ് ഷിറിയ, ഖാലിദ് ബംബ്രാണ, സത്താർ ആരിക്കാടി, അബ്ദുൽലത്തീഫ് കുമ്പള, മുഹമ്മദലി എന്നിവർ സംസാരിച്ചു.

ആരിക്കാടിയിലെ ടോൾപ്ലാസയ്ക്കെതിരെ കർമസമിതി ഹൈക്കോടതിയെ സമീപിക്കുകയും ജനങ്ങൾ ഒറ്റക്കെട്ടായി സമരം നടത്തുകയും ചെയ്യുമ്പോൾ ദേശീയപാതാ അതോറിറ്റി ടോൾപിരിവ് ആരംഭിക്കാൻ ശ്രമിച്ചത് ഏകപക്ഷീയവും ജനദ്രോഹപരവുമാണെന്ന് കർമസമിതി ചെയർമാൻ എ.കെ.എം.അഷ്റഫ് എംഎൽഎ പറഞ്ഞു.

റേഷൻവിതരണവും പ്രതിസന്ധിയിലാകും

ബുധനാഴ്ച മുതൽ ആരിക്കാടിയിൽ ടോൾപിരിവ് ആരംഭിക്കുമ്പോൾ അത് റേഷൻവിതരണത്തെയും പ്രതിസന്ധിയിലാക്കുമെന്ന് ആശങ്ക. അമിതമായ ടോളാണ് ലോറികൾക്ക് ഏർപ്പെടുത്തിയിട്ടുള്ളത്. ഇരുഭാഗത്തേക്കും പോയിവരണമെങ്കിൽ 440 രൂപ കൊടുക്കേണ്ടിവരും.

നീലേശ്വരം എഫ്‌സിഐയിൽനിന്ന് ദിനംപ്രതി 15-ഓളം ലോഡ്‌ മഞ്ചേശ്വരം ഡിപ്പോയിലേക്ക് കൊണ്ടുപോകണം. തുച്ഛമായ വാടകയാണ് വാഹനങ്ങൾക്ക് കിട്ടുന്നത്. മാസത്തിൽ 120 ലോഡ് അവിടെ കൊണ്ടുപോകണം. അതിനാൽ അധികാരികൾ ഇടപെട്ട് റേഷൻ കൊണ്ടുപോകുന്ന ലോറികളെ ടോളിൽനിന്ന്‌ ഒഴിവാക്കണമെന്ന് ഗുഡ്‌സ് ട്രാൻസ്പോർട്ട് വർക്കേഴ്‌സ് യൂണിയൻ ജില്ലാ സെക്രട്ടറി വെങ്ങാട്ട് ശശി ആവശ്യപ്പെട്ടു.