അരുണാചൽ പ്രദേശ് ഇന്ത്യയുടേത്, എത്ര മറച്ചാലും വസ്തുതകൾ മറയ്ക്കാനാകില്ല; ചൈനക്കെതിരെ ആഞ്ഞടിച്ച് ഇന്ത്യ
ന്യൂഡൽഹി: ഷാങ്ഹായ് വിമാനത്താവളത്തില്‍ മണിക്കൂറുകളോളം തടഞ്ഞുവെച്ചെന്നും അപമാനിച്ചെന്നുമുള്ള അരുണാചല്‍ പ്രദേശ് സ്വദേശിനിയുടെ ആരോപണങ്ങളിൽ ചൈന നടത്തിയ പ്രതികരണത്തെ തള്ളി ഇന്ത്യ. എത്ര നിരാകരിച്ചാലും അരുണാചൽ ഇന്ത്യയുടേതാണെന്ന വസ്തുത മറയ്ക്കാനാവില്ലെന്ന് വിദേശകാര്യ മന്ത്രാലയം പ്രസ്താവനയിൽ വ്യക്തമാക്കി. 24 മണിക്കൂർ വരെ എല്ലാ രാജ്യക്കാർക്കും വിസ രഹിത ട്രാൻസിറ്റ് അനുവദിക്കുന്ന ചൈനയുടെ സ്വന്തം നിയമങ്ങളുടെ ലംഘനമാണെന്നും വിദേശകാര്യ മന്ത്രാലയ വക്താവ് രൺധീർ ജയ്സ്വാൾ പറഞ്ഞു.
ഇമിഗ്രേഷന്‍ കൗണ്ടറിലെ ഉദ്യോഗസ്ഥര്‍ ഇന്ത്യന്‍ പാസ്പോര്‍ട്ടിന് സാധുതയില്ലെന്ന് പറയുകയും മണിക്കൂറുകളോളം തടഞ്ഞുവെക്കുകയും ചെയ്തെന്നായിരുന്നു യുവതിയിയുടെ ആരോപണം.
ഇന്ത്യൻ പൗരയെ തടഞ്ഞുവെച്ചത് ചൈനീസ് അധികൃതർക്ക് ഇതുവരെ വിശദീകരിക്കാനായിട്ടില്ലെന്നും അന്താരാഷ്ട്ര വ്യോമയാത്രാ കൺവെൻഷനുകളുടെ ലംഘനമാണിതെന്നും അദ്ദേഹം ചൂണ്ടിക്കാട്ടി.
യുവതിയെ യാതൊരു നിര്‍ബന്ധിത നടപടികള്‍ക്കോ തടങ്കലിനോ പീഡനത്തിനോ വിധേയമാക്കിയിട്ടില്ലെന്നാണ് സംഭവത്തെക്കുറിച്ചുള്ള ചോദ്യങ്ങള്‍ക്ക് മറുപടിയായി ചൈനീസ് വിദേശകാര്യ മന്ത്രാലയ വക്താവ് മാവോ നിങ് വ്യക്തമാക്കിയത്.
യുകെയില്‍ താമസിക്കുന്ന ഇന്ത്യന്‍ വംശജയായ പ്രെമ വാങ്ജോം തോങ്ഡോക് എന്ന യുവതിയാണ് കഴിഞ്ഞ ദിവസം സോഷ്യല്‍ മീഡിയയില്‍ ദുരനുഭവം പങ്കുവെച്ചത്. നവംബര്‍ 21-നായിരുന്നു സംഭവം. ലണ്ടനില്‍നിന്ന് ജപ്പാനിലേക്കുള്ള യാത്രാമധ്യേ ഷാങ്ഹായ് പുഡോങ് വിമാനത്താവളത്തില്‍ മൂന്ന് മണിക്കൂര്‍ ട്രാന്‍സിറ്റിനിടെയായിരുന്നു ഇത്.
പാസ്പോര്‍ട്ടില്‍ ജന്മസ്ഥലമായി അരുണാചല്‍ പ്രദേശ് രേഖപ്പെടുത്തിയിരിക്കുന്നതാണ് ചൈനീസ് അധികൃതരെ പ്രകോപിപ്പിച്ചത്. ഇതോടെ തന്റെ മൂന്ന് മണിക്കൂര്‍ യാത്ര 18 മണിക്കൂര്‍ നീണ്ട ദുരിതമായി മാറിയെന്നും യുവതി ആരോപിച്ചിരുന്നു.