രാജീവ് ഗാന്ധി വധക്കേസ് ; പ്രതി പേരറിവാളന് പരോൾ
ചെന്നൈ : രാജീവ് ഗാന്ധി വധക്കേസിലെ പ്രതി പേരറിവാളന് രണ്ട് ആഴ്ചത്തെ പരോള് അനുവദിച്ച് മദ്രാസ് ഹൈക്കോടതി.
പേരറിവാളനുള്പ്പെടെ കേസിലെ ഏഴ് പ്രതികളെ വിട്ടയയ്ക്കാന് തമിഴ്നാട് 2018 സെപ്റ്റംബറിലാണു തീരുമാനിച്ചിരുന്നു. എന്നാല് ഇനിയും ഗവര്ണര് തീരുമാനമെടുക്കാത്ത സാഹചര്യത്തിലാണു പേരറിവാളന് സുപ്രീം കോടതിയെ സമീപിച്ചത്.
പേരറിവാളന്റെ ജയില് മോചനത്തിന് തമിഴ്നാട് സര്ക്കാര് തീരുമാനിച്ച് രണ്ട് വര്ഷം കഴിഞ്ഞിട്ടും ഗവര്ണര് അംഗീകാരം നല്കാത്തതില് സുപ്രീം കോടതി നേരത്തെ അതൃപ്തി പ്രകടിപ്പിച്ചിരുന്നു. വധത്തിനു പിന്നിലെ ഗൂഢാലോചന സംബന്ധിച്ച അന്വേഷണം 20 വര്ഷമായിട്ടും പൂര്ത്തിയാകാത്തതിനെയും ജസ്റ്റിസ് എല് നാഗേശ്വര റാവു അധ്യക്ഷനായ ബെഞ്ച് വിമര്ശിച്ചിരുന്നു.
കേസിലെ പ്രതികളില് പേരറിവാളന്റെയും മറ്റു 2 പേരുടെയും ദയാഹര്ജി രാഷ്ട്രപതി തീര്പ്പാക്കുന്നതിലുണ്ടായ കാലതാമസം കണക്കിലെടുത്ത് വധശിക്ഷ ജീവപര്യന്തം തടവാക്കാന് സുപ്രീം കോടതി 2014 ലാണ് തീരുമാനിച്ചത്.