പോറ്റിയേ കേറ്റിയേ’ പാട്ടിനെതിരെ ഡിജിപിക്ക് പരാതി: ശക്തമായ നടപടി വേണമെന്ന് സി.പി.എമ്മും
പത്തനംതിട്ട: ശബരിമല സ്വര്ണക്കൊള്ള തിരഞ്ഞെടുപ്പില് പ്രചാരണായുധമാക്കാനായി ഉണ്ടാക്കിയ ‘പോറ്റിയേ കേറ്റിയേ’ എന്ന പാരഡി ഗാനത്തിനെതിരെ ഡിജിപിക്ക് പരാതി. തിരുവാഭരണപാത സംരക്ഷണ സമിതി ജനറല് സെക്രട്ടറി പ്രശാന്ത് കുഴിക്കാലയാണ് പരാതിക്കാരന്. ഭക്തിഗാനം വികലമാക്കി ഉപയോഗിച്ചെന്നാണ് പരാതിക്കാരന്റെ വാദം.
ഗാനം തദ്ദേശ തിരഞ്ഞെടുപ്പില് വ്യാപകമായി പ്രചരിച്ചിരുന്നു. യുഡിഎഫ് തിരഞ്ഞെടുപ്പ് പ്രചാരണത്തിലാണ് ഗാനം ഉപയോഗിച്ചിരുന്നത്. പരാതി വന്ന പശ്ചാത്തലത്തില് ശക്തമായ നടപടി ആവശ്യപ്പെട്ട് സിപിഎമ്മും രംഗത്തെത്തിയിട്ടുണ്ട്. അയ്യപ്പഭക്തരുടെ വികാരങ്ങളെ വൃണപ്പെടുത്തുന്നതാണ് ഗാനമെന്ന് സിപിഎം പത്തനംതിട്ട ജില്ലാ സെക്രട്ടറി രാജു എബ്രഹാം പറഞ്ഞു.