സ്പെയിനിൽ അതിവേഗ ട്രെയിനുകൾ കൂട്ടിയിടിച്ച് 46 പേർ കൊല്ലപ്പെട്ടു; നിരവധി പേർക്ക് പരുക്ക്

മാഡ്രിഡ്: സ്പെയിനിലെ സെൻട്രൽ പ്രവിശ്യയായ ടോളിഡോയിൽ ബുധനാഴ്ച രാവിലെ രണ്ട് അതിവേഗ ട്രെയിനുകൾ കൂട്ടിയിടിച്ച് 64 പേർ കൊല്ലപ്പെട്ടു. അപകടത്തിൽ നിരവധി യാത്രക്കാർക്കു പരുക്കേറ്റതായാണ് റിപ്പോർട്ട്. ഒരേ ദിശയിൽ സഞ്ചരിക്കുകയായിരുന്ന ഒരു അതിവേഗ ട്രെയിൻ മുന്നിലുണ്ടായിരുന്ന മറ്റൊരു ട്രെയിന്റെ പിൻഭാഗത്ത് ഇടിക്കുകയായിരുന്നുവെന്ന് സ്പാനിഷ് സ്റ്റേറ്റ് ബ്രോഡ്കാസ്റ്ററായ ടിവിഇ റിപ്പോർട്ട് ചെയ്തു. ഇടിയുടെ ആഘാതത്തിൽ ട്രെയിനിന്റെ രണ്ട് ബോഗികൾ ട്രാക്കിൽനിന്നു പുറത്തായി.

അപകടത്തെ തുടർന്ന് തലസ്ഥാനമായ മാഡ്രിഡിനെ സിയുഡാഡ് റിയൽ, ആൻഡലൂഷ്യ എന്നിവയുമായി ബന്ധിപ്പിക്കുന്ന റെയിൽ സർവീസുകൾ പൂർണമായി തടസ്സപ്പെട്ടു. അപകടമുണ്ടായ റൂട്ടുകളിലെ സർവീസുകൾ താൽക്കാലികമായി നിർത്തിവച്ചതായി സ്പെയിനിലെ റെയിൽ ഇൻഫ്രാസ്ട്രക്ചർ ഓപ്പറേറ്ററായ എഡിഐഎഫ് സ്ഥിരീകരിച്ചു.

ട്രെയിൻ അപകടത്തിൽ സ്പാനിഷ് പ്രധാനമന്ത്രി പെഡ്രോ സാഞ്ചസ് കടുത്ത ഞെട്ടൽ രേഖപ്പെടുത്തി. ഇരകളായവരോടും അവരുടെ കുടുംബങ്ങളോടും ഐക്യദാർഢ്യം പ്രഖ്യാപിച്ച അദ്ദേഹം, ദുരന്തബാധിതരെ സഹായിക്കാനും സുരക്ഷ ഉറപ്പാക്കാനും എല്ലാ ഭരണസംവിധാനങ്ങളുമായും ഏകോപിപ്പിച്ച് അടിയന്തര രക്ഷാപ്രവർത്തകർ സംഭവസ്ഥലത്ത് സജീവമായി രംഗത്തുണ്ടെന്ന് പറഞ്ഞു. അപകടസ്ഥലത്തിനു സമീപമുള്ള ഉർദ നഗരത്തിലെ മേയർ മാനുവൽ ഗാലൻ, ലോസ് യെബെനെസ് വില്ലേജ് മേയർ ഹെസൂസ് പെരസ് എന്നിവർ അപകടം അതീവ ഗുരുതരമാണെന്ന് സ്ഥിരീകരിച്ചു.