മധുര കവർച്ച: നിഷാന്ത് അറസ്റ്റിൽ, ബസിൽനിന്ന് രക്ഷപ്പെടാൻ ശ്രമിച്ച് പ്രതി; എല്ലാം പെൺസുഹൃത്തിന് വേണ്ടി

മധുര: തമിഴ്നാട്ടിലെ മധുരയിൽ പുതുതായി പ്രവർത്തനം ആരംഭിച്ച തനിഷ്ക് ജ്വല്ലറി ഷോറൂമിൽ നടന്ന വൻ കവർച്ചാക്കേസിൽ മുഖ്യപ്രതിയും യൂട്യൂബറുമായ നിഷാന്ത് അറസ്റ്റിൽ. സേലത്തേക്കുള്ള ബസിൽനിന്നാണ് നിഷാന്തിനെ പോലീസ് പിടികൂടിയത്. കേസുമായി ബന്ധപ്പെട്ട് നിഷാന്തിന്റെ പെൺസുഹൃത്തും ഇൻഫ്ലുവൻസറുമായ മീനാക്ഷിയെയും നിഷാന്തിന്റെ പിതാവ് സുരേഷിനെയും നേരത്തെ തന്നെ പോലീസ് അറസ്റ്റ്ചെയ്തിരുന്നു.
ബസിൽ യാത്ര ചെയ്യുകയായിരുന്ന നിഷാന്തിനെ അധിയമാൻകോട്ട പോലീസ് പിന്തുടർന്ന് പിടികൂടുകയായിരുന്നു. പോലീസ് അടുത്തെത്തിയതറിഞ്ഞ പ്രതി ബസിൻ്റെ ജനാലയിലൂടെ പുറത്തേക്ക് ചാടി രക്ഷപ്പെടാൻ ശ്രമിച്ചെങ്കിലും പോലീസ് കീഴ്പ്പെടുത്തുകയായിരുന്നു.
മധുര ബൈപ്പാസ് റോഡിലെ പഴങ്ങാനത്തത്ത് പുതുതായി തുറന്ന തനിഷ്ക് ഷോറൂമിൽ നവംബർ 12-ന് പുലർച്ചെയായിരുന്നു കവർച്ച. കവർച്ചയ്ക്ക് മുൻപ് നിഷാന്ത് ഉപഭോക്താവെന്ന വ്യാജേന മൂന്ന് തവണ ഷോറൂമിലെത്തി സുരക്ഷാ സംവിധാനങ്ങൾ നിരീക്ഷിച്ചിരുന്നതായി സിസിടിവി ദൃശ്യങ്ങളിൽനിന്ന് പോലീസ് കണ്ടെത്തി. പുതിയ ഷോറൂം ആയതിനാൽ പൂർണമായ ലോക്കർ സംവിധാനം സജ്ജമായിരുന്നില്ല. കൂടാതെ, രാത്രികാലങ്ങളിൽ അലാറം പ്രവർത്തിപ്പിക്കാതിരുന്നതും പ്രതിക്ക് തുണയായി. കെട്ടിടത്തിന് പിന്നിലെ സ്കഫോൾഡിങ് വഴി ടെറസിലെത്തിയ നിഷാന്ത്, ലിഫ്റ്റ് ഷാഫ്റ്റിലൂടെ അകത്തുകടന്നാണ് ആഭരണങ്ങൾ കവർന്നത്.
മോഷ്ടിച്ച ആഭരണങ്ങളിൽ സ്വർണവും വജ്രവും ചാക്കിലാക്കി മാടക്കുളം കുളത്തിന് സമീപമുള്ള ഒരു കൃഷിയിടത്തിൽ കുഴിച്ചിട്ടിരിക്കുകയായിരുന്നു. ബാക്കി ആഭരണങ്ങളുമായി നിഷാന്ത് ഒളിവിൽ പോയി. കവർച്ചാസമയത്ത് നിഷാന്ത് ധരിച്ചിരുന്ന വസ്ത്രങ്ങൾ കത്തിച്ചുകളഞ്ഞ് തെളിവ് നശിപ്പിക്കാൻ പിതാവ് സുരേഷ് സഹായിച്ചതായും പോലീസ് കണ്ടെത്തി.
ഓട്ടോറിക്ഷാ യാത്രയുടെ വിവരങ്ങൾ, മൊബൈൽ ഫോൺ സിഗ്നലുകൾ, പ്രദേശത്തെ ഒരു കാലിവളർത്തുകാരൻ നൽകിയ നിർണായക വിവരം എന്നിവയുടെ അടിസ്ഥാനത്തിലാണ് പോലീസ് പ്രതികളിലേക്ക് എത്തിയത്. മാടക്കുളത്തെ കൃഷിയിടത്തിൽ കുഴിച്ചിട്ട നിലയിൽ ആറ് കിലോ സ്വർണവും വജ്രാഭരണങ്ങളും പോലീസ് കണ്ടെടുത്തു. അറസ്റ്റിലായ മീനാക്ഷിയെയും സുരേഷിനെയും കോടതിയിൽ ഹാജരാക്കി നവംബർ 29 വരെ ജുഡീഷ്യൽ കസ്റ്റഡിയിൽ റിമാൻഡ് ചെയ്തു.
കവർച്ച നടത്തിയത് അറസ്റ്റിലായ യുറ്റ്യൂബർ മീനാക്ഷിയുടെ ആവശ്യങ്ങൾക്ക് വേണ്ടിയായിരുന്നുവെന്നാണ് അന്വേഷക സംഘത്തിന്റെ കണ്ടെത്തൽ. മീനാക്ഷിയും നിശാന്തും മധുരയിലെ കോളേജിൽ ഒരുമിച്ച് പഠിച്ചവരാണ്. ഇടയ്ക്കുവെച്ച് നിശാന്ത് പഠനം നിർത്തിയെങ്കിലും ഇരുവരും സൗഹൃദം തുടർന്നിരുന്നു. നിശാന്തും യുറ്റ്യൂബറാണ്. വീട് നിർമാണത്തിനും മറ്റുമായി മീനാക്ഷിക്ക് വൻതുക വേണ്ടിവന്നതിനെത്തുടർന്നാണ് നിശാന്ത് ജൂവലറി കവർച്ച ആസൂത്രണം ചെയ്തത്.
നവംബർ 12-ന് കവർച്ചയ്ക്കുശേഷം നിശാന്ത് സ്വർണം നിറച്ച ബാഗ് അച്ഛൻ സുരേഷിനെ ഏൽപ്പിച്ച് മീനാക്ഷിയുടെ സ്കൂട്ടറിൽ രക്ഷപ്പെടുകയായിരുന്നു. സുരേഷ് സ്വർണം പഴങ്കാനത്തെ വീട്ടിലാണ് ആദ്യം സൂക്ഷിച്ചത്. പിറ്റേന്ന് നിശാന്ത് സ്വർണം കൊണ്ടുപോയി. നിശാന്തിന്റെ വീട്ടിൽ നടത്തിയ പരിശോധനയിൽ നിശാന്ത് കവർച്ച ദിവസം ഇട്ടിരുന്ന ഷൂസും കൈയുറകളും കണ്ടെത്തിയിരുന്നുവെന്ന് പോലീസ് കമ്മിഷണർ എസ്. രാജേന്ദ്രൻ പറഞ്ഞു.

