പാലാ ബിഷപ്പിന്റെ പരാമര്ശം: കോടതിയെ സമീപിക്കാനൊരുങ്ങി മുസ്ലിം സംഘടനകള്
കോഴിക്കോട്: പാലാ ബിഷപ്പിന്റെ വിവാദ പരാമര്ശത്തില് കോടതിയെ സമീപിക്കാനൊരുങ്ങി മുസ്ലിം സംഘടനകള്. ബിഷപ്പിനെതിരെ കേസ് എടുക്കാന് സര്ക്കാര് വൈകുന്ന സാഹചര്യത്തിലാണ് നീക്കം. സര്ക്കാര് നിലപാടിനെതിരെ സമര പരിപാടികള് സംഘടിപ്പിക്കാനും തീരുമാനമായി.
പരാമര്ശത്തിനെതിരെ ഇതിനോടകം തന്നെ സംസ്ഥാനത്തെ വിവിധ പൊലീസ് സ്റ്റേഷനുകളില് നിരവധി പരാതികള് ലഭിച്ചിട്ടുണ്ട്.എന്നാല് ബിഷപ്പിനെതിരെ നടപടി സ്വീകരിക്കാനോ പ്രശ്നം പരിഹരിക്കാനോ സംസ്ഥാന സര്ക്കാര് തയ്യാറായിട്ടില്ല. ഈ സാഹചര്യത്തില് കോടതിയെ സമീപിക്കാന് ആലോചിച്ചിരിക്കുകയാണ് മുസ്ലിം സംഘടനകള്. കോട്ടയം പൗരാവകാശ സംരക്ഷണ സമിതിയുടെ നേതൃത്വത്തിലാണ് നീക്കം. മഹലുകള് കേന്ദ്രീകരിച്ച് പ്രതിഷേധ സമരം സംഘടിപ്പിക്കാനാണ് പൗരാവകാശ സമിതിയുടെ നീക്കം.
വിവാദം തൊടുത്തുവിട്ട പാലാ ബിഷപ്പ് പ്രശ്ന പരിഹാരത്തിന് മുന്നോട്ട് വരാത്തതിനെയും മുസ്ലിം സംഘടനകള് വിമര്ശിച്ചു. ഒത്തുതീര്പ്പിന് ശ്രമിക്കേണ്ട സര്ക്കാര് പ്രശ്നം വഷളാക്കുകയാണെന്ന് സംഘടനകള് ആരോപിക്കുന്നു.