സാംസങ് റഷ്യയില് വില്പന നിര്ത്തിവെച്ചു; യുക്രെയ്ന് 60 ലക്ഷം ഡോളര് സഹായം
ലോകത്തിലെ പ്രമുഖ സ്മാര്ട്ട് ഫോണ് നിര്മാതാക്കളായ സാംസങ് റഷ്യയില് ഫോണുകളുടെയും ചിപ്പുകളുടെയും വിതരണം നിര്ത്തിവെച്ചു.റഷ്യയുടെ യുക്രെയ്ന് അധിനിവേശത്തെ തുടര്ന്നാണ് കമ്ബനിയുടെ തീരുമാനം. സാഹചര്യങ്ങള് നിരീക്ഷിച്ച് തുടര് നടപടികള് സ്വീകരിക്കുമെന്നും കമ്ബനി അധികൃതര് അറിയിച്ചു.
ചൈനയുടെ ഷവോമി, അമേരിക്കയുടെ ആപ്പ്ള് എന്നിവയേക്കള് ദക്ഷിണ കൊറിയന് ഇലക്ട്രോണിക് ഭീമന്മാരായ സാംസങ്ങിനാണ് റഷ്യയില് സ്മാര്ട്ട് ഫോണ് ബ്രാന്ഡുകളില് ഏറ്റവും കൂടുതല് സ്വീകാര്യതയുള്ളത്. കൂടാതെ, യുക്രെയ്ന് സഹായമായി കണ്സ്യൂമര് ഇലക്ട്രോണിക്സ് ഉല്പന്നങ്ങള് ഉള്പ്പെടെ 60 ലക്ഷം ഡോളറിന്റെ സഹായം നല്കുമെന്നും കമ്ബനി അറിയിച്ചു.
പശ്ചാത്യ ഉപരോധത്തിനു പിന്നാലെ ലോകത്തിലെ പ്രമുഖ കാര് നിര്മാതാക്കള് ഉള്പ്പെടെ നിരവധി കമ്ബനികളാണ് റഷ്യയില് വില്പന നിര്ത്തിവെച്ചത്. വെള്ളിയാഴ്ച മൈക്രോസോഫ്റ്റ് അവരുടെ ഉല്പന്നങ്ങളുടെ വില്പനയും സര്വിസും റഷ്യയില് നിര്ത്തിവെച്ചിരുന്നു.