പ്രതിഷേധങ്ങള്ക്കിടെ കെ റെയില് കല്ലിടല് ഇന്നും തുടരും
കണ്ണൂര് | സില്വര് ലൈനിനെതിരായ പ്രതിഷേദങ്ങള്ക്കിടെ സര്വേ കല്ലിടല് ഇന്നും തുടരും.രാവിലെ 10 മണി മുതലാണ് ഉദ്യോഗസ്ഥര് കല്ലിടല് നടപടികള് ആരംഭിക്കുക. ഉദ്യോഗസ്ഥരെ ഇന്നും തടയാന് തന്നെയാണ് പ്രതിഷേധക്കാരുടെ തീരുമാനം. എന്നാല് പോലീസ് സഹായത്തോടെ കല്ലിടാനാണ് ഉദ്യോഗസ്ഥരുടെ നീക്കം. ഒരു ഇടവേളയ്ക്ക് ശേഷം ഇന്നലെയാണ് വീണ്ടും കല്ലിടല് നടപടികള് ആരംഭിച്ചിരുന്നത്.
ഇന്നലെ തിരുവനന്തപുരത്തും കണ്ണൂരിലുമാണ് കല്ലിടല് പുനരാരംഭിച്ചിരുന്നത്. രണ്ടിടത്തും കടുത്ത പ്രതിഷേധങ്ങള് രൂപപ്പെടുകയും കോണ്ഗ്രസ് സമരം കടുപ്പിക്കുകയും ചെയ്തിരുന്നു. തിരുവനന്തപുരം കണിയാപുരത്ത് പ്രതിഷേധിച്ച കോണ്ഗ്രസ് പ്രവര്ത്തകനെ പോലീസ് ബൂട്ടിട്ട് ചവുട്ടിയ സംഭവം വിവാദമായിരുന്നു. ഇതിനു പിന്നാലെ റൂറല് എസ്പി അന്വേഷണം പ്രഖ്യാപിച്ചിരുന്നു. ഈ ഉദ്യോഗസ്ഥനെതിരെ ഇന്ന് നടപടിയുണ്ടാകുമെന്നാണ് റിപ്പോര്ട്ട്.
കണ്ണൂരിലും വലിയ രീതിയിലുള്ള പ്രതിഷേധമാണ് ഇന്നലെയുണ്ടായത്. കല്ലിടലിനെതിരെ കണ്ണൂര് ചാലയില് വീണ്ടും യൂത്ത് കോണ്ഗ്രസ് പ്രതിഷേധം നടന്നു. യൂത്ത് കോണ്ഗ്രസ് പ്രവര്ത്തകര് സില്വര് ലൈന് കല്ലുകള് പിഴുതുമാറ്റി. പ്രവര്ത്തകരും പോലീസ് ഉദ്യോഗസ്ഥരും തമ്മില് വാക്കേറ്റമുണ്ടായി. കെപിസിസി അധ്യക്ഷന് കെ സുധാകരനും ഇവിടെയെത്തിയിരുന്നു.
നേരത്തെ തന്നെ ഇവിടെ യൂത്ത് കോണ്ഗ്രസ് പ്രതിഷേധം നടത്തിയിരുന്നു. ഇവരെ അറസ്റ്റ് ചെയ്ത് നീക്കിയതിനു ശേഷമാണ് ഇവിടെ കല്ല് സ്ഥാപിച്ചത്. ആ സര്വേക്കല്ലാണ് ഇപ്പോള് പിഴുതുമാറ്റിയിരിക്കുന്നത്.