ഒരാഴ്ചയ്ക്കുള്ളില് രാജ്യത്ത് കോവിഡ് കേസുകള് ഇരട്ടിയായി; കൂടുതല് ഡല്ഹിയില്
തുടങ്ങിയ സംസ്ഥാനങ്ങളിലാണ് കേസുകളില് വര്ധനവുള്ളത്.
ഡൽഹിയിൽ നിന്നുള്ള കാഴ്ച |ഫോട്ടോ:ANI
ന്യൂഡല്ഹി: മറ്റൊരു കോവിഡ് തരംഗം സംബന്ധിച്ച് ആരോഗ്യ വിദഗ്ദ്ധര് ഇതുവരെ മുന്നറിയിപ്പ് നല്കിയില്ലെങ്കിലും രാജ്യത്തെ കോവിഡ് കേസുകള് ഒരാഴ്ചയ്ക്കുള്ളില് ഇരട്ടിയായി. 11 ആഴ്ചയോളമായി രാജ്യത്തെ കേസുകള് ഗണമ്യമായ കുറവ് വന്നതിന് ശേഷം കഴിഞ്ഞ മൂന്നാഴ്ചക്ക് ശേഷമാണ് വര്ധനവ് വന്നുതുടങ്ങിയത്.
ഡല്ഹി, ഹരിയാണ, ഉത്തര്പ്രദേശ് തുടങ്ങിയ സംസ്ഥാനങ്ങളിലാണ് കേസുകളില് കൂടുതല് വര്ധനവുള്ളത്. അതില് ഡല്ഹിയിലാണ് ഏറ്റവും കൂടുതല് റിപ്പോര്ട്ട് ചെയ്യപ്പെടുന്നതും. കഴിഞ്ഞ തുടര്ച്ചയായ മൂന്ന് ദിവസങ്ങളില് ഡല്ഹിയിലെ പ്രതിദിന കോവിഡ് രോഗികളുടെ എണ്ണം ആയിരത്തിന് മുകളിലാണ്. ഞായറാഴ്ച 1083 കേസുകള് റിപ്പോര്ട്ട് ചെയ്തു.
24 മണിക്കൂറിനിടെ രാജ്യത്ത് 2,593 പേര്ക്കാണ് കോവിഡ് സ്ഥിരീകരിച്ചത്. ഇതോടെ രാജ്യത്തെ സജീവ കേസുകള് 15,873 ആയി. 44 കോവിഡ് അനുബന്ധ മരണങ്ങളും ഒരു ദിവസത്തിനിടെ റിപ്പോര്ട്ട് ചെയ്തു. രാജ്യത്തെ ടെസ്റ്റ് പോസിറ്റിവിറ്റി നിരക്ക് 0.84 ശതമാനമാണ്. ഡല്ഹിയിലേത് 4.48 ശതമാനവും.