അപകടത്തില്പ്പെട്ടത് 3 ട്രെയിനുകള്, സമീപകാലത്തെ ഏറ്റവും വലിയ ട്രെയിന്ദുരന്തം; നടുങ്ങി രാജ്യം
ഭുവനേശ്വര്: ഒഡിഷയില് ട്രെയിനുകള് കൂട്ടിയിടിച്ചുണ്ടായ അപകടത്തില് രണ്ട് യാത്രാതീവണ്ടികളടക്കം മൂന്ന് തീവണ്ടികള് ഉള്പ്പെട്ടതായി ഒഡിഷ ചീഫ് സെക്രട്ടറി പ്രദീപ് ജെന.ഷാലിമാറില് നിന്ന് (കൊല്ക്കത്ത)-ചെന്നൈ സെൻട്രലിലേക്ക് പോകുകയായിരുന്ന കോറോമാണ്ടല് എക്സ്പ്രസും (12841) , യശ്വന്ത്പുര്- ഹൗറ (12864) എക്സ്പ്രസും ഒരു ഗുഡ്സ് ട്രെയിനുമാണ് അപകടത്തില്പ്പെട്ടത്. സമീപകാലത്ത് രാജ്യത്തുണ്ടായ ഏറ്റവും വലിയ ട്രെയിനപകടമാണ് വെള്ളിയാഴ്ച ഒഡിഷയില് സംഭവിച്ചത്.
കോറോമാണ്ടല് എക്സ്പ്രസിന്റെ പത്തോളം കോച്ചുകള് പാളം തെറ്റിയെന്ന് റെയില്വേ വക്താവ് അമിതാഭ് ഷര്മ അറിയിച്ചു. പാളം തെറ്റിയ ട്രെയിൻ കോച്ചുകള് തൊട്ടടുത്ത ട്രാക്കിലേക്ക് തെറിച്ചുവീണതാണ്
യശ്വന്ത്പുര്- ഹൗറ ട്രെയിൻ കൂടി അപകടത്തില്പ്പെടാൻ കാരണം. ഇതോടെ യശ്വന്ത്പുറില് നിന്നും ഹൗറയിലേക്ക് പോവുകയായിരുന്ന 12864 ബെംഗളൂരു-ഹൗറ സൂപ്പര്ഫാസ്റ്റ് എക്സ്പ്രസും അപകടത്തില്പ്പെട്ടു. ഈ ട്രെയിനിന്റെമൂന്ന്-നാല് കോച്ചുകള് അപകടത്തില്പ്പെട്ടതായും അദ്ദേഹം കൂട്ടിച്ചേര്ത്തു. ഗുഡ്സ് ട്രെയിൻ കൂട്ടിയിടിച്ചാണ് കോറോമാണ്ടല് എക്സ്പ്രസ് പാളം തെറ്റിയതെന്നായിരുന്നു പ്രാഥമിക വിവരം.എന്നാല് ഇതിന് ഔദ്യോഗിക സ്ഥിരീകരണമില്ല.
ബാലസോര് ജില്ലയിലെ ബഹനാഗ ബസാര് റെയില്വേ സ്റ്റേഷനില് വെള്ളിയാഴ്ച രാത്രി ഏഴിനാണ് അപകടം നടന്നതെന്നാണ് വിവരം. അപകടസ്ഥലത്തുനിന്നുള്ള വീഡിയോ ദൃശ്യങ്ങളടക്കം സാമൂഹ്യ മാധ്യമങ്ങളില് പ്രചരിക്കുന്നുണ്ട്. ഗുരുതരമായി പരിക്കേറ്റ നിരവധി യാത്രക്കാരുടെ ദൃശ്യങ്ങളടക്കമാണ് പ്രചരിക്കുന്നത്. തകര്ന്ന നിലയിലുള്ള തീവണ്ടി കോച്ചുകളുടെ ദൃശ്യങ്ങളും പുറത്തുവന്നിട്ടുണ്ട്.
രക്ഷാപ്രവര്ത്തനം പുരോഗമിക്കുകയാണ്. നിരവധി പേര് അപകടസ്ഥലത്ത് കുടുങ്ങി കിടക്കുന്നുണ്ടെന്നാണ് വിവരം.
അപകടത്തിന്റെ പശ്ചാത്തലത്തില് ദക്ഷിണ റെയില്വേ കണ്ട്രോള് റൂം തുറന്നു. നമ്ബര്:044-25330952, 044-25330953 & 044-25354771