വൈദ്യുതി മുടങ്ങി: മുംബൈ നഗരം നിശ്ചലമായി

മുംബൈ: വിതരണ ശൃംഖലയിലുണ്ടായ തകരാറിനെതുടർന്ന് രാജ്യത്തെ സാമ്പത്തിക തലസ്ഥാനമായ മുംബൈ നിശ്ചലമായി. ഇതോടെ ടെലികോം, റെയിൽ മേഖലകളെല്ലാം സ്തംഭിച്ചതായാണ് റിപ്പോർട്ട്. അതേസമയം, സ്റ്റോക്ക് എക്സ്ചേഞ്ചുകളായ ബിഎസ്ഇയും എൻഎസ്ഇയും സാധാരണരീതിയിൽതന്നെ പ്രവർത്തിച്ചു.

വൈദ്യുതി തകരാറിനെതുടർന്ന് സെൻട്രൽ റെയിൽവെയിലെ സർവീസുകൾ നിർത്തിവെച്ചതായി റെയിൽവെ ട്വീറ്റിലൂടെ അറിയിച്ചു. ടാറ്റ പവറിന്റെ വിതരണശൃംഖലയിലെ തകരാറാണ് വൈദ്യുതി മുടങ്ങാനിടയാക്കിയതെന്ന് വെസ്റ്റേൺ റെയിൽവെ ട്വീറ്റ് ചെയ്തു. നഗരത്തിലെ ട്രാഫിക് സിഗ്നലുകളും പ്രവർത്തിക്കാതായി.

കാൽവ-പഡ്ഗെ പവർഹൗസിലുണ്ടായ സാങ്കേതിക തകരാറാണ് കാരണമെന്നും ഒരുമണിക്കൂറിനകം വൈദ്യുതി വിതരണം പുനഃസ്ഥാപിക്കാൻ കഴിയുമെന്ന് പ്രതീക്ഷിക്കുന്നതായും മഹാരാഷ്ട്ര ഊർജ വകുപ്പ് മന്ത്രി നിതിൻ റാവത്ത് അറയിച്ചു. രാവിലെ 10മണിയോടെയാണ് വൈദ്യുതി വിതരണം തടസ്സപ്പെട്ടത്. ബ്രിഹൻമുംബൈ ഇലക്ട്രിക് സപ്ലൈ ആൻഡ് ട്രാൻസ്പോർട്ട്(ബെസ്റ്റ്)ആണ് മുംബൈയിൽ വൈദ്യുതി വിതരണംചെയ്യുന്നത്.