മാന്യ ക്രിക്കറ്റ് സ്റ്റേഡിയം; പഞ്ചായത്ത് ഭരണസമിതിക്കെതിരെ മന്ത്രിക്ക് സി.പി.എം നിവേദനം

ബദിയടുക്ക: മാന്യ ക്രിക്കറ്റ് സ്റ്റേഡിയത്തിനായി റവന്യൂസ്ഥലവും തോടും കൈയേറിയ സംഭവത്തിൽ ബദിയടുക്ക പഞ്ചായത്ത് ഭരണസമിതിയുടെ അനുകൂല തീരുമാനത്തിനെതിരെ സി.പി.എം തദ്ദേശ മന്ത്രി എം.ബി. രാജേഷിന് നിവേദനം നൽകി. പഞ്ചായത്ത് ഭരണസമിതി തീരുമാനം നിയമപരമല്ലെന്ന് ചൂണ്ടിക്കാട്ടി പഞ്ചായത്ത് സെക്രട്ടറി സർക്കാറിലേക്ക് എഴുതിയിരുന്നു. കൈയേറി നിരപ്പാക്കിയ പഞ്ചായത്തുസ്ഥലവും തോടും പാട്ടത്തിന് നൽകി ക്രമപ്പെടുത്താൻ ജൂലൈ 26ന് നടന്ന പഞ്ചായത്ത് ഭരണസമിതി തീരുമാനിക്കുകയായിരുന്നു. ഇതിനെതിരയാണ് സെക്രട്ടറി വിയോജിപ്പ് രേഖപ്പെടുത്തിയത്.