ചോദ്യം ചെയ്ത ശേഷം വിവരങ്ങള് പുറത്തു വിടും, പ്രതിയെ എത്രയും പെട്ടെന്ന് കേരളത്തിലെത്തിക്കും-DGP
തിരുവനന്തപുരം: എലത്തൂര് ട്രെയിന് തീവെപ്പു കേസിലെ അക്രമി ഷാരൂഖ് സെയ്ഫിയുടെ അറസ്റ്റു സ്ഥിരീകരിച്ച് ഡി.ജി.പി അനില്കാന്ത്. ഇയാളെ ഉടന് കേരളത്തിലെത്തിക്കുമെന്നും ഇതിനായുള്ള നടപടികള് മഹാരാഷ്ട്ര ഡി.ജി.പിയുമായി ചേര്ന്ന് കൈക്കൊണ്ടെന്നും ഡി.ജി.പി അറിയിച്ചു. ആക്രമണത്തിലേക്കു നയിച്ച കാരണങ്ങള് പിടിയിലായ അക്രമിയെ വിശദമായി ചോദ്യം ചെയ്ത ശേഷം മാത്രമെ വ്യക്തമാകൂ എന്നും കൂടുതല് വിവരങ്ങള് പിന്നീട് അറിയിക്കുമെന്നും അദ്ദേഹം വ്യക്തമാക്കി. മഹാരാഷ്ട്രയിലെ രത്നഗിരിയിലെ ഒരു ആശുപത്രിയില് നിന്നാണ് പ്രതിയെ പിടികൂടിയത്. പ്രതിയുടെ മുഖത്ത് പൊള്ളലേറ്റ പാടുകളുണ്ട്. ഇതിന് ചികിത്സ തേടാനാണ് ഇയാള് രത്നഗിരിയിലെ ആശുപത്രിയിലെത്തിയത്. രഹസ്യ വിവരത്തിന്റെ അടിസ്ഥാനത്തില് മഹാരാഷ്ട്ര തീവ്രവാദ വിരുദ്ധ സ്ക്വാഡ് പരിശോധനയ്ക്ക് എത്തിയപ്പോള് ഇവിടെനിന്നും രക്ഷപ്പെടാന് ശ്രമിച്ച പ്രതിയെ സംഘം കീഴ്പ്പെടുത്തി കസ്റ്റഡിയിലെടുക്കുകയായിരുന്നു. കേന്ദ്ര ഇന്റലിജന്സ് ഏജന്സികളുടെ സഹായത്തോടെയാണ് മഹാരാഷ്ട്ര എടിഎസ് ഇയാളെ പിടികൂടിയത്. ഫോട്ടോ, ഫോണ് ലൊക്കേഷന് ഉള്പ്പെടെയുള്ള വിവരങ്ങള് അനുസരിച്ചാണ് പ്രതിയിലേക്കെത്തിയത്.