ഓണം സ്പെഷ്യൽ ട്രെയിൻ ബുക്കിങ് തുടങ്ങി; ചെന്നൈ – കൊല്ലം, തിരുവനന്തപുരം – താമ്പരം 16 സർവീസുകൾ കൂടി

കൊച്ചി: ഓണം സ്പെഷ്യൽ ട്രെയിനുകളുടെ ബുക്കിങ് ആരംഭിച്ച് സതേൺ റെിൽവേ. പുതിയ രണ്ട് ഓണം സ്പെഷ്യൽ ട്രെയിനുകൾ കൂടി സതേൺ റെയിൽവേ പ്രഖ്യാപിച്ചിട്ടുണ്ട്. ചെന്നൈ സെൻട്രലിൽ നിന്ന് കൊല്ലത്തേക്കും, തിരുവനന്തപുരം സെൻട്രലിൽ നിന്ന് താമ്പരത്തേക്കുമാണ് പുതിയ സർവീസുകൾ. കഴിഞ്ഞദിവസം മംഗളൂരു – ചെന്നൈ എഗ്മോർ റൂട്ടിലും സ്പെഷ്യൽ ട്രെയിൻ അനുവദിച്ചിട്ടുണ്ട്. ഇന്ന് രാവിലെ എട്ട് മണിയ്ക്കാണ് ഈ സർവീസുകളുടെ ടിക്കറ്റ് റിസർവേഷൻ ആരംഭിച്ചത്.

ഓണാവധിയ്ക്ക് നാട്ടിലേക്ക് വരാൻ ആഗ്രഹിക്കുന്ന മലയാളികൾക്ക് പ്രയോജനപ്പെടുന്ന സർവീസുകളാണ് റെയിൽവേ പ്രഖ്യാപിച്ചരിക്കുന്നത്. രണ്ട് ട്രെയിനുകൾ കൂടി 16 സർവീസുകളാണ് ആകെ നടത്തുന്നത്. ട്രെയിനുകളുടെ സ്റ്റോപ്പും സമയക്രമവും അറിയാം.

തിരുവനന്തപുരം സെൻട്രൽ – താംബരം സ്പെഷ്യൽ ട്രെയിൻ

ട്രെയിൻ നമ്പർ 06110 തിരുവനന്തപുരം സെൻട്രൽ – താമ്പരം എക്സ്പ്രസ് സ്പെഷ്യൽ ട്രെയിൻ തിരുവനന്തപുരത്തുനിന്ന് ഓഗസ്റ്റ് 12, 19, 26, സെപ്റ്റംബർ 2 തീയതികളിൽവൈകീട്ട് 3:45ന് പുറപ്പെട്ട് പിറ്റേന്ന് രാവിലെ 10:00ന് താംബരത്തെത്തും. വർക്കല 04:15, കൊല്ലം 04:55, കൊട്ടാരക്കര 05:28, ആവണീശ്വരം 05:40 പുനലൂർ 06:00, സെങ്കോട്ട 08:20, തെങ്കാശി 08:45, കടയനല്ലൂർ, ശങ്കരൻ കോവിൽ, രാജപാളയം, ശ്രീവില്ലിപുത്തൂർ, ശിവകാശി, വിരുദുനഗർ, മധുര, കൊടൈക്കനാൽ റോഡ്, ദിണ്ടിഗൽ, തിരുച്ചിറപ്പള്ളി, ശ്രീരംഗം, അരിയല്ലൂർ, വിഴുപുരം, മേൽമറവത്തൂർ, ചെങ്കൽപ്പെട്ട് സ്റ്റേഷനുകൾ പിന്നിട്ടാണ് ട്രെയിൻ താമ്പരത്തെത്തുക.

മടക്കയാത്ര ട്രെയിൻ നമ്പർ 06109 താംബരത്തു നിന്ന് ഓഗസ്റ്റ് 13, 20, 27, സെപ്റ്റംബർ മൂന്ന് തീയതികളിൽ ഉച്ചയ്ക്ക് രണ്ടിന് പുറപ്പെട്ട് പിറ്റേന്ന് രാവിലെ 7:15-ന് തിരുവനന്തപുരത്തെത്തും. രാവിലെ 03:50ന് പുനലൂരെത്തുന്ന ട്രെയിൻ, ആവണീശ്വരം 04:10, കൊട്ടാരക്കര 04:22, കൊല്ലം 05:00, വർക്കല 05:25 സ്റ്റേഷനുകൾ പിന്നിട്ടാണ് തിരുവനന്തപുരത്തെത്തുക.

‘ബെംഗളൂരുവിലെ രണ്ടാമത്തെ വിമാനത്താവളം ദക്ഷിണ ബെംഗളൂരുവിൽ; ആരെയും കുടിയിറക്കില്ല’; സുപ്രധാന വിവരം പങ്കുവച്ച് മുഖ്യമന്ത്രി
ചെന്നൈ സെൻട്രൽ – കൊല്ലം സ്പെഷ്യൽ ട്രെയിൻ

ട്രെയിൻ നമ്പർ 06119 ചെന്നൈ സെൻട്രൽ – കൊല്ലം സ്പെഷ്യൽ ട്രെയിൻ ചെന്നൈ സെൻട്രലിൽനിന്ന് ഓഗസ്റ്റ് 12, 19, 26, സെപ്റ്റംബർ രണ്ട് തീയതികളിൽ വൈകീട്ട് 3:10ന് പുറപ്പെട്ട് പിറ്റേന്ന് രാവിലെ 7:20ന് കൊല്ലത്തെത്തും. രാത്രി 12:05ന് പാലക്കാട് എത്തുന്ന ട്രെയിൻ തൃശൂർ 10:55, ആലുവ 01:50, എറണാകുളം ടൗൺ 02:13, കോട്ടയം 03:27, ചങ്ങനാശേരി 03:48, തിരുവല്ല 03:59, ചെങ്ങന്നൂർ 04:10, മാവേലിക്കര 04:33, കായംകുളം 04:42 എന്നീ സ്റ്റേഷനുകൾ പിന്നിട്ടാണ് കൊല്ലത്തെത്തുക.

മടക്കയാത്ര ട്രെയിൻ നമ്പർ 06120 കൊല്ലത്തുനിന്ന് ഓഗസ്റ്റ് 13,20,27 സെപ്റ്റംബർ മൂന്ന് തീയതികളിൽ രാവിലെ 10:40 ന് പുറപ്പെട്ട് പിറ്റേന്ന് രാവിലെ 03:30ന് ചെന്നൈ സെൻട്രലിലെത്തും. കായംകുളം 11:20, മാവേലിക്കര 11:31, ചെങ്ങന്നൂർ 11:43, തിരുവല്ല 11:54, ചങ്ങനാശേരി 12:03, കോട്ടയം 12:22, എറണാകുളം ടൗൺ 01:35, ആലുവ 02:03, തൃശൂർ 03:00, പാലക്കാട് 04:50 എന്നിങ്ങനെയാണ് കേരളത്തിലെ സ്റ്റോപ്പുകളിലെത്തുന്ന ട്രെയിൻ.