മാധ്യമപ്രവർത്തകൻ എസ് വി പ്രദീപിന്റെ മരണം ; ഇടിച്ച ലോറി കണ്ടെത്തി , ഡ്രൈവർ കസ്റ്റഡിയിൽ
തിരുവനന്തപുരം: മാദ്ധ്യമപ്രവര്ത്തകന് എസ് വി പ്രദീപിനെ ഇടിച്ച ലോറി കണ്ടെത്തി. ലോറിയുടെ ഡ്രൈവര് വട്ടിയൂര്ക്കാവ് മണികണ്ഠേശ്വരം സ്വദേശി ജോയിയേയും പൊലീസ് കസ്റ്റഡിയിലെടുത്തു. ഫോര്ട്ട് എ സി പ്രതാപന്റെ നേതൃത്വത്തിലുളള സംഘമാണ് ജോയിയെ കസ്റ്റഡിയിലെടുത്തത്. ഈഞ്ചയ്ക്കല് വച്ച് പിടികൂടിയ ജോയിയെ ഇപ്പോള് നേമം പൊലീസ് സ്റ്റേഷനില് എത്തിച്ചിരിക്കുകയാണ്.
അപകടം നടന്ന സമയത്ത് മണ്ണുമായി നെയ്യാറ്റിന്കര ഭാഗത്തേക്ക് പോവുകയായിരുന്നു ജോയി. അവിടെ മണ്ണിറക്കിയ ശേഷം വിവരം അറിഞ്ഞ് രക്ഷപ്പെടാന് ശ്രമിക്കവെയാണ് ഇയാളെ പിടികൂടിയത് എന്നാണ് ഇപ്പോള് ലഭ്യമായ വിവരം.
ഇന്നലെ ഉച്ചയ്ക്ക് ശേഷം മൂന്നരയ്ക്കായിരുന്നു അപകടം ഉണ്ടായത്. എസ് വി പ്രദീപിനെ ഇടിച്ചിട്ട ലോറി നിര്ത്താതെ പോവുകയായിരുന്നു. കാരയ്ക്കാമണ്ഡപം സിഗ്നലിന് സമീപം വച്ചാണ് അപകടം ഉണ്ടായത്. ട്രാഫിക് സി സി ടി വി ഇല്ലാത്ത സ്ഥലം ആയിരുന്നതിനാല് വാഹനം കണ്ടെത്താന് കഴിഞ്ഞിരുന്നില്ല. സമീപത്തെ കടയിലെ സി സി ടി വി ദൃശ്യം മാത്രമാണ് പൊലീസിന് കിട്ടിയിരുന്നത്. അതിനെ അടിസ്ഥാനമാക്കിയായിരുന്നു അന്വേഷണം.
നിരവധി ചാനലുകളില് പ്രവര്ത്തിച്ചിരുന്നു എസ് വി പ്രദീപ് ഇപ്പോള് ഒരു ഓണ്ലൈന് മാദ്ധ്യമത്തിന്റെ ഭാഗമായി പ്രവര്ത്തിച്ച് വരികയായിരുന്നു. അടുത്തിടെ സംസ്ഥാനത്തെ പിടിച്ചുകുലുക്കിയ സ്വര്ണക്കടത്തിന്റെ ഉളളറകള് തേടിയുളള നിരവധി റിപ്പോര്ട്ടുകള് അദ്ദേഹം പുറത്ത് കൊണ്ടുവന്നിരുന്നു. അത്തരത്തിലുളള ഒരു വന് വെളിപ്പെടുത്തലിന് എസ് വി പ്രദീപ് ഒരുങ്ങുകയായിരുന്നു എന്നാണ് ലഭിക്കുന്ന വിവരം. അതിനാല് തന്നെ അപകടത്തില് പലരും സംശയം ഉന്നയിക്കുന്നുമുണ്ട്.