കാലിക്കടവ് പഞ്ചായത്ത് സ്റ്റേഡിയം യാഥാര്‍ഥ്യത്തിലേക്ക്.
കാസര്‍കോട് വികസന പാക്കേജില്‍ രണ്ട് കോടിരൂപയും പിലിക്കോട് പഞ്ചായത്ത് 35 ലക്ഷം രൂപയും നവീകരണത്തിനായ് അനുവദിച്ചു.
കാസര്‍കോട്: ജില്ലയുടെ കായിക കുതിപ്പിന് കരുത്തേകാന്‍ കാലിക്കടവ് പഞ്ചായത്ത് സ്റ്റേഡിയം യാഥാര്‍ഥ്യമാകുന്നു. കാലിക്കടവ് മൈതാനം അന്താരാഷ്ട്ര നിലവാരത്തിലെത്തിക്കുന്നതിന് മുന്നോടിയായുള്ള മണ്ണ് പരിശോധന ആരംഭിച്ചു. കാസര്‍കോട് വികസന പാക്കേജില്‍ രണ്ട് കോടിരൂപയും പിലിക്കോട് പഞ്ചായത്ത് 35 ലക്ഷം രൂപയും നവീകരണത്തിന് അനുവദിച്ചിട്ടുണ്ട്. സിന്തറ്റിക്ക് സെവന്‍സ് ഫുട്‌ബോള്‍ കോര്‍ട്ട്, 200 മീറ്റര്‍ സിന്തറ്റിക്ക് ട്രാക്ക്, സിന്തറ്റിക്ക് വോളിബോള്‍, ബാസ്‌കറ്റ്‌ബോള്‍ കോര്‍ട്ട്, ജംപിങ് പിറ്റ്, ഗ്യാലറി, ജിംനേഷ്യം, മറ്റ് അനുബന്ധ സൗകര്യങ്ങള്‍ എന്നിവയോട് കൂടിയ സ്റ്റേഡിയം കോംപ്ലക്‌സാണ് വിഭാവനം ചെയ്യുന്നത്.
കായിക താരങ്ങള്‍ക്കുള്ള വിശ്രമത്തിന് വെവ്വേറെ മുറികള്‍, താരങ്ങള്‍ക്ക് താമസ സൗകര്യവും ഒരുക്കും. ലെവന്‍സ് ഫുട്‌ബോള്‍ കോര്‍ട്ട്, റണ്ണിംഗ് ട്രാക്ക്, ക്യാമ്പിംഗ്, ഡ്രസ്സിംഗ് സംവിധാനങ്ങളോട് കൂടിയ സ്റ്റേഡിയം ഒരു വര്‍ഷം കൊണ്ട് പൂര്‍ത്തിയാകും. കണ്‍സ്ട്രക്ഷന്‍ കോര്‍പറേഷന്‍ അധികൃതരും കോലഞ്ചേരി ഡബ്ല്യൂവിഎ കണ്‍സള്‍ട്ടിങ് പ്രതിനിധികളും അടുത്തിടെ സ്ഥലം സന്ദര്‍ശിച്ചിരുന്നു. ദേശീയപാതയ്ക്ക് അനവദിച്ച സ്ഥലത്തിന് നഷ്ടപരിഹാരമായി കിട്ടുന്ന തുക ഉപയോഗിച്ച് രണ്ടാംഘട്ട പ്രവര്‍ത്തിയും നടത്താനാണ് പദ്ധതി.
നിരവധി ദേശീയ സംസ്ഥാന കായിക മാമാങ്കത്തിന് വേദിയായ ജില്ലയിലെ പ്രധാന മൈതാനമാണ് വികസനത്തിലേക്ക് കുതിക്കാന്‍ പോകുന്നത്. ദേശീയ തലത്തിലടക്കം നിരവധി താരങ്ങളെ സമ്മാനിച്ച മണ്ണ് കൂടിയാണിത്. ദേശീയപാതക്ക് സമീപത്തായുള്ള മൈതാനം വിപുലീകരിക്കണമെന്ന കായികതാരങ്ങളുടെയും നാട്ടുകാരുടെയും വര്‍ഷങ്ങളുടെ ആവശ്യമാണ് നിറവേറുന്നത്.