മദ്യപിച്ച് ഡ്യൂട്ടിക്കെത്തി: കണ്ട്രോളിങ് ഇന്സ്പെക്ടറടക്കം രണ്ടുപേരെ KSRTC സസ്പെന്ഡ് ചെയ്തു
തിരുവനന്തപുരം; മദ്യപിച്ച് ഡ്യൂട്ടിക്കെത്തിയ രണ്ട് ഉദ്യോഗസ്ഥരെ കെഎസ്ആര്ടിസി സസ്പെന്ഡ് ചെയ്തു. കട്ടപ്പന യൂണിറ്റിലെ ജനറല് കണ്ട്രോളിംഗ് ഇന്സ്പെക്ടര് കെ.കെ കൃഷ്ണന്, ഇന്സ്പെക്ടര് പി.പി തങ്കപ്പന് എന്നിവരെയാണ് അന്വേഷണ വിധേയമായി സസ്പെന്ഡ് ചെയ്തത്. ഈ മാസം 18ന് വിജിലന്സ് ഓഫീസറുടെ നിര്ദ്ദേശ പ്രകാരം കട്ടപ്പന ഡിപ്പോയില് വിജിലന്സ് നടത്തിയ പരിശോധനയ്ക്കിടെ ഇവരോട് സംസാരിച്ചപ്പോള് രൂക്ഷമായ മദ്യത്തിന്റെ ഗന്ധവും, ഭാഷയില് അവ്യക്തതയും കണ്ടെത്തുകയായിരുന്നു. ഡ്യൂട്ടിയിലുണ്ടായിരുന്ന മറ്റൊരു ഓഫീസറുടെ സാന്നിധ്യത്തില് പരിശോധന നടത്തവെ ഇരുവരും മദ്യപിച്ചതായി കണ്ടെത്തുകയുമായിരുന്നു. കോര്പ്പറേഷനില് നടക്കുന്ന ക്രമക്കേടുകളും കുറ്റകൃത്യങ്ങളും കണ്ടെത്തി റിപ്പോര്ട്ട് സമര്പ്പിക്കേണ്ടതും മറ്റ് ജീവനക്കാര്ക്ക് മാതൃകയുമാകേണ്ട സൂപ്പര്വൈസറി തസ്തികയിലുള്ള ജീവനക്കാര് ഡ്യൂട്ടി സമയം മദ്യപിച്ചത് ഗുരുതരമായ വീഴ്ചയാണ്. ജീവനക്കാര് മദ്യപിച്ച് കൊണ്ട് ഡിപ്പോ പരിസരത്ത് എത്തുകയോ, ഡ്യൂട്ടി നിര്വ്വഹിക്കാന് പാടില്ലെന്ന സിഎംഡിയുടെ ആവര്ത്തിച്ചുള്ള ഉത്തരവ് നിലനില്ക്കെ അത് ലംഘിച്ചതാണെന്ന് തെളിഞ്ഞ സാഹചര്യത്തിലാണ് ഇരുവരേയും അന്വേഷണവിധേയമായി സസ്പെന്ഡ് ചെയ്തത്