ഡെങ്കിപ്പനി വ്യാപനം തടയാൻ ജാഗ്രത വേണം, നീണ്ടുനില്ക്കുന്ന പനി ശ്രദ്ധിക്കണം- ആരോഗ്യമന്ത്രി
തിരുവനന്തപുരം: ഇടവിട്ടുള്ള മഴ തുടരുന്ന സാഹചര്യത്തില് ഡെങ്കിപ്പനിയ്ക്കും എലിപ്പനിയ്ക്കുമെതിരെ അതീവ ജാഗ്രത പാലിക്കണമെന്ന് ആരോഗ്യമന്ത്രി വീണ ജോര്ജ്. 2013 നും 2017നും സമാനമായി ഈ വര്ഷം ഡെങ്കിപ്പനി രോഗവ്യാപനം വളരെ കൂടുതലുണ്ടാകുമെന്ന് പ്രതീക്ഷിച്ചിരുന്നുവെന്നും മുന്കൂട്ടി ജാഗ്രതാനിര്ദേശം നല്കി രോഗപ്രതിരോധ പ്രവര്ത്തനങ്ങള് ശക്തമാക്കിയതിനാല് കാര്യമായ തോതില് കേസുകള് വര്ധിച്ചിട്ടില്ലെന്നും മന്ത്രി വ്യക്തമാക്കി. ഇടവിട്ടുള്ള മഴ തുടരുന്നതിനാല് വീടുകളും സ്ഥാപനങ്ങളും പൊതുഇടങ്ങളും കൊതുകുകളുടെ നിയന്ത്രണം തുടരേണ്ടതുണ്ടെന്നും ഡെങ്കിപ്പനി പ്രതിരോധത്തില് കൂട്ടായ പ്രവര്ത്തനം അത്യാവശ്യമാണെന്നും മന്ത്രി പറഞ്ഞു. പകര്ച്ചപ്പനി പ്രതിരോധത്തിന്റെ ഭാഗമായി മന്ത്രിയുടെ നേതൃത്വത്തില് നടന്ന ഉന്നതതലയോഗത്തിലാണ് ഇക്കാര്യങ്ങൾ പറഞ്ഞത്. ആരോഗ്യ വകുപ്പ് തദ്ദേശ സ്ഥാപനങ്ങളും ജില്ലാ ഭരണകൂടവുമായി ചേര്ന്ന് പ്രവര്ത്തിക്കേണ്ടതാണെന്ന് നിര്ദേശം നല്കിയിട്ടുണ്ട്. ജില്ലാ മെഡിക്കല് ഓഫീസര്മാര് ജില്ലാ കളക്ടര്മാരുമായി കൂടിയാലോചിച്ച് വിവിധ വകുപ്പുകളും ജനപ്രതിനിധികളുമായും ചര്ച്ച ചെയ്ത് വാര്ഡുതലം മുതലുള്ള ഫീല്ഡുതല പ്രവര്ത്തനങ്ങള് ശക്തിപ്പെടുത്തണം. എല്ലാ ജില്ലകളിലേയും ഹോട്ട് സ്പോട്ടുകള് ജില്ലകള്ക്കും തദ്ദേശ സ്ഥാപനങ്ങള്ക്കും കൈമാറുകയും അത് പ്രസിദ്ധീകരിക്കുകയും വേണമെന്നും ആശുപത്രികളില് മരുന്നുകളുടെ ലഭ്യത ഉറപ്പ് വരുത്തണമെന്നും മന്ത്രി വ്യക്തമാക്കി. ജനപ്രതിനിധികളേയും സന്നദ്ധ പ്രവര്ത്തകരേയും വിവിധ വകുപ്പുകളേയും പ്രതിരോധ പ്രവര്ത്തനങ്ങളില് പങ്കാളികളാക്കണം. വരുന്ന 8 ആഴ്ചകളില് വെള്ളി, ശനി, ഞായര് ദിവസങ്ങള് തോറും ഡ്രൈ ഡേ ആചരിക്കണം. വെള്ളിയാഴ്ച സ്കൂളുകള്, ശനിയാഴ്ച ഓഫീസുകള്, ഞായറാഴ്ച വീടുകള് എന്നിങ്ങനെയാണ് ഡ്രൈ ഡേ ആചരിക്കേണ്ടത്. സ്വകാര്യ ആശുപത്രികളിലെ പകര്ച്ചപ്പനി കേസുകള് കൃത്യമായി റിപ്പോര്ട്ട് ചെയ്യേണ്ടതാണെന്നും മന്ത്രി അറിയിച്ചു. മരണം പരമാവധി ഒഴിവാക്കാന് പ്രോട്ടോകോള് അനുസരിച്ച് ചികിത്സ ഉറപ്പാക്കേണ്ടതുണ്ട്. അതിനായി സര്ക്കാര്, സ്വകാര്യ മേഖലയില് തുടര്പരിശീലനങ്ങള് പൂര്ത്തിയാക്കാന് ജില്ലാ മെഡിക്കല് ഓഫീസര്മാര്ക്ക് നിര്ദേശം നല്കിയിട്ടുണ്ട്. ഒപ്പം വീടും പരിസരങ്ങളും സ്ഥാപനങ്ങളും വൃത്തിയായി സൂക്ഷിക്കുകയും ചെയ്യണം. വീടിന്റെ പുറത്തും അകത്തും ചെറുതും വലുതുമായ ഇടങ്ങളില് വെള്ളം കെട്ടിനില്ക്കാതെ നോക്കണം. അലക്ഷ്യമായി വലിച്ചെറിയുന്ന പ്ലാസ്റ്റിക്ക്, ചിരട്ട മുതലായവയില് വെള്ളം കെട്ടി നിന്ന് കൊതുക് വളരാം. വീട്ടിനകത്തെ ചെടികള് വയ്ക്കുന്ന ട്രേ കൊതുകിന്റെ ഉറവിടമാകാറായി കാണുന്നുണ്ട്. അതിനാല് ചെടിച്ചട്ടികളുടെയും ഫ്രിഡ്ജിലേയും ട്രേയിലെ വെള്ളം ആഴ്ചതോറും മാറ്റണം. ആക്രിക്കട, ടയര്കട എന്നിവിടങ്ങൾ വെള്ളം വീഴാതെ സുരക്ഷിതമാക്കണം. ജലക്ഷാമമുള്ള സ്ഥലങ്ങളില് വെള്ളം ശേഖരിച്ച് വയ്ക്കുന്ന പാത്രങ്ങളും നിര്മ്മാണ സ്ഥലത്തിലെ ടാങ്കുകളും കൊതുകിന്റെ പ്രജനന കേന്ദ്രമാകാതെ ശരിയായ രീതിയില് മൂടി വയ്ക്കേണ്ടത് അത്യാവശ്യമാണ്. പനി ബാധിച്ചാല് സ്വയം ചികിത്സ പാടില്ല. നീണ്ടുനില്ക്കുന്ന പനി വളരെ ശ്രദ്ധിക്കണം. എലിപ്പനി പ്രതിരോധത്തിനായി മണ്ണുമായും മലിനജലവുമായും ഇടപെടുന്നവര് നിര്ബന്ധമായും ആരോഗ്യ പ്രവര്ത്തകരുടെ നിര്ദേശാനുസരണം എലിപ്പനി പ്രതിരോധ ഗുളികയായ ഡോക്സിസൈക്ലിന് കഴിക്കേണ്ടതാണെന്നും മന്ത്രി അറിയിച്ചു.