പാണ്ട്യാലമുക്ക് ടിപ്പിക്കല് പാര്ട്ടിഗ്രാമം, പ്രതിക്ക് ധൈര്യം പകര്ന്നതാര്’- വിമര്ശിച്ച് ബല്റാം
പാലക്കാട്: കണ്ണൂരിലെ സി.പി.എം. പ്രവര്ത്തകന് പുന്നോല് താഴെവയലില് ഹരിദാസനെ വെട്ടിക്കൊന്ന കേസില് കഴിഞ്ഞദിവസം അറസ്റ്റിലായ ബി.ജെ.പി. പ്രവര്ത്തകന് ഒളിവില് കഴിഞ്ഞ വീടിനെ ചൊല്ലി വിവാദം മുറുകുന്നു. ‘ഞങ്ങളറിയാതെ ഒരീച്ച ഇവിടെ പറക്കില്ല’ എന്ന് സി.പി.എമ്മുകാര് വീമ്പു പറയാറുള്ള ഒരു ടിപ്പിക്കല് പാര്ട്ടി ഗ്രാമമാണ് പിണറായി പാണ്ട്യാലമുക്ക് എന്ന് കോണ്ഗ്രസ് മുന് എം.എല്.എ. വി.ടി. ബല്റാം ഫെയ്സ്ബുക്ക് കുറിപ്പില് ആരോപിച്ചു.
”അവിടെയാണ് ആ പാര്ട്ടിയുടെ പരമോന്നത നേതാവ് കൂടിയായ സംസ്ഥാന മുഖ്യമന്ത്രിയുടെ വീടിന്റെ വെറും 200 മീറ്റര് മാത്രം അകലെ ഒരു സി.പി.എമ്മുകാരനെ കൊന്ന കേസിലെ ആര്.എസ്.എസുകാരനായ പ്രതി ദിവസങ്ങളോളം ഒളിവില് കഴിഞ്ഞത്! പിണറായി വിജയന്റെ ഈ വീട് നോക്കിക്കാണാന് പുറത്തുനിന്ന് രണ്ട് പാര്ട്ടി സഖാക്കള് വന്നുവെന്നതിന്റെ പേരിലാണ് ഒരുകാലത്ത് സി.പി.എമ്മില് വലിയ വിഭാഗീയതയുണ്ടായതും അത് വളര്ന്ന് ടി.പി. ചന്ദ്രശേഖരന്റെ കൊലപാതകം വരെ എത്തിയതും എന്ന് കേരളത്തിന്റെ ഓര്മ്മയിലുണ്ട്. മുഖ്യമന്ത്രിയുടെ വീടിന്റെ പരിസരം എന്ന നിലയില് 24 മണിക്കൂറും പോലീസ് ബന്തവസ്സും സി.പി.എമ്മിന്റെ ശക്തമായ നിരീക്ഷണ സംവിധാനങ്ങളുമുള്ള ഒരു പ്രദേശത്ത് തന്നെ ആര്.എസ്.എസുകാരനായ പ്രതി ഒളിയിടം കണ്ടെത്തിയെങ്കില് അതിനയാള്ക്ക് ധൈര്യം പകര്ന്നതാരാണ്?”- ബല്റാം കുറിപ്പില് ആരാഞ്ഞു.