ചെമ്മനാട് ഗ്രാമ പഞ്ചായത്തിൽ സൈബർ ആക്രമണം രൂക്ഷം: തെരഞ്ഞെടുപ്പ് മുന്നോടിയിൽ അപകീർത്തിപ്രചാരണം വ്യാപകമെന്ന് ജനകീയ നീതിവേദിയുടെ പരാതി
മേൽപറമ്പ്: ചെമ്മനാട് ഗ്രാമ പഞ്ചായത്തിൽ ത്രിതല തെരഞ്ഞെടുപ്പ് ചൂടുപിടിക്കുന്ന സാഹചര്യത്തിൽ, സൈബർ ആക്രമണങ്ങളും അപകീർത്തിപ്രചാരണങ്ങളും എല്ലാ അതിരുകളും ലംഘിക്കുന്ന സ്ഥിതിയിലാണെന്നു ജില്ലാ ജനകീയ നീതിവേദി ജില്ലാ സൈബർ സെല്ലിൽ നൽകിയ പരാതിയിൽ ആരോപിച്ചു.
ജില്ലാ ജനകീയ വികസന സമിതിയുടെ പിന്തുണയോടെ ആറ് വാർഡുകളിൽ മത്സരിക്കുന്ന സ്ഥാനാർഥികളെ ലക്ഷ്യമിട്ടാണ് കഴിഞ്ഞ ദിവസങ്ങളിൽ സാമൂഹ്യ മാധ്യമങ്ങളിലെ ദുഷ്പ്രചാരണം ശക്തമായതെന്ന് പരാതിയിൽ പറയുന്നു.
ഫേസ്ബുക്കിലും വിവിധ വാട്സാപ്പ് ഗ്രൂപ്പുകളിലും, ജനകീയ വികസന സമിതിയെയും ജനകീയ നീതിവേദിയെയും പരിഹാസ്യകരമായും അപകീർത്തികരമായും ചിത്രീകരിക്കുന്ന വ്യാജ പോസ്റ്റുകളും ഫോട്ടോ മോർഫിംഗുകളും, പത്രക്കട്ടിംഗ് രൂപത്തിൽ തോന്നിക്കുന്ന കൃത്രിമ രേഖകളും നിരന്തരം പ്രചരിപ്പിക്കപ്പെടുന്നതായി പരാതിയിൽ വ്യക്തമാക്കുന്നു.
ഒരു പ്രത്യേക രാഷ്ട്രീയ – സമുദായ വിഭാഗത്തിന്റെ പ്രവർത്തകരാണ് ഏകോപിതമായി ഈ ദുഷ്പ്രചാരണങ്ങൾക്ക് പിന്നിലുണ്ടെന്ന് ജനകീയ നീതിവേദി ആരോപിക്കുന്നു. ഇത് സ്ഥാനാർഥികളുടെ വ്യക്തിഹത്യയ്ക്കും തെരഞ്ഞെടുപ്പ് സമാധാനം തകർക്കുവാനും ലക്ഷ്യമിട്ടുള്ള പദ്ധതിബദ്ധമായ നീക്കമാണെന്നും പരാതിയിൽ ചൂണ്ടിക്കാട്ടുന്നു.
തിരഞ്ഞെടുപ്പ് ചട്ടങ്ങളും ഐ.ടി. നിയമങ്ങളും ലംഘിക്കുന്ന ഇത്തരം പ്രവർത്തനങ്ങൾ ഗൗരവത്തോടെ പരിശോധിച്ച്, ബന്ധപ്പെട്ടവർക്കെതിരെ കർശനമായ നിയമനടപടികൾ സ്വീകരിക്കണമെന്ന് ആവശ്യപ്പെട്ടുകൊണ്ട്, ബന്ധപ്പെട്ട തെളിവുകളോടെ ജില്ലാ പ്രസിഡണ്ട് സൈഫുദ്ദീൻ കെ. മാക്കോട്യും ജനറൽ സെക്രട്ടറി ഹമീദ് ചാത്തങ്കൈയും ജില്ലാ സൈബർ സെൽ അധികാരികൾക്ക് രേഖാമൂലം പരാതി സമർപ്പിച്ചു.
ജില്ലാ സൈബർ സെൽ പരാതി ഏറ്റുവാങ്ങി പ്രാഥമിക പരിശോധന ആരംഭിച്ചിട്ടുണ്ടെന്നാണ് ലഭ്യമായ വിവരം.