അല്-അഖ്സ ഇമാമിനെ അറസ്റ്റ് ചെയ്ത് ഇസ്രായേല് പോലിസ്
കിഴക്കന് ജറുസലേമിലെ പള്ളി കോംപൗണ്ടില് നിന്ന് അല്-അഖ്സ പള്ളി ഇമാം ഷെയ്ഖ് മുഹമ്മദ് അലി അല്-അബ്ബാസിയെ അറസ്റ്റ് ചെയ്ത് ഇസ്രായേല് പോലിസ്. അറസ്റ്റിനുള്ള കാരണങ്ങളോ അദ്ദേഹത്തിനെതിരെ സ്വീകരിച്ച നിയമ നടപടികളോ വ്യക്തമാക്കാതെയാണ് അറസ്റ്റ് ചെയ്തതെന്ന് പ്രാദേശിക മാധ്യമങ്ങള് റിപ്പോര്ട്ട് ചെയ്തു. അല്-അഖ്സ പള്ളി സമുച്ചയത്തിനുള്ളില് വെച്ച് ഉദ്യോഗസ്ഥര് ഷെയ്ഖ് അല്-അബ്ബാസിയെ തടഞ്ഞുവച്ചതായി ദൃക്സാക്ഷികള് പറഞ്ഞു.
ഇമാമുമാര്ക്കും പ്രസംഗകര്ക്കും മേലുള്ള നിയന്ത്രണങ്ങള് വര്ദ്ധിപ്പിക്കുക, വിശ്വാസികളുടെ പ്രവേശനത്തില് കര്ശനമായ നിയന്ത്രണങ്ങള് ഏര്പ്പെടുത്തുക, കനത്ത പോലീസ് സംരക്ഷണത്തില് കുടിയേറ്റക്കാരുടെ സന്ദര്ശനങ്ങള് വര്ദ്ധിക്കുക എന്നിവയുള്പ്പെടെ അല്-അഖ്സ പള്ളിയില് ഇസ്രായേല് നടപടികള് വര്ദ്ധിക്കുന്നതിനിടേയാണ് പുതിയ സംഭവം.
ജറുസലേമിലെ പഴയ നഗരത്തിലും അല്-അഖ്സ കോമ്പൗണ്ടിലും സംഘര്ഷം രൂക്ഷമായിട്ടുണ്ട്. മതനേതാക്കളെയും പ്രാദേശിക പ്രവര്ത്തകരെയും ലക്ഷ്യമിട്ടുള്ള അറസ്റ്റുകളും നാടുകടത്തല് ഉത്തരവുകളും റിപ്പോര്ട്ട് ചെയ്യപ്പെട്ടിട്ടുണ്ട്. ഷെയ്ഖ് അല്-അബ്ബാസിയുടെ തടങ്കലിന്റെ സാഹചര്യങ്ങളെക്കുറിച്ച് ഇസ്രായേല് അധികൃതര് ഇതുവരെ വിശദീകരണം നല്കിയിട്ടില്ല.