വെടിനിര്ത്തല് ചര്ച്ചകള്ക്ക് വേണ്ടി പാക്കിസ്ഥാൻ ലക്ഷ്യമാക്കി കുതിച്ചുയര്ന്ന വിമാനം; 40,000 അടി ഉയരത്തില് യാത്ര ചെയ്യവേ ആ സംഘം കണ്ടത് നെഞ്ച് പിളര്ക്കുന്ന കാഴ്ച; സീറ്റുകളില് പതിപ്പിച്ച നിലയില് മിനാബിലെ കുറച്ച് നിഷ്കളങ്കമായ കുരുന്ന് മുഖങ്ങള്; ഒരുനിമിഷം മൗനമായി നിന്ന് ഇറാൻ സ്പീക്കര്; ലോക ശ്രദ്ധ നേടി ചിത്രങ്ങള്
ടെഹ്റാൻ/പാക്കിസ്ഥാൻ: അമേരിക്കയും ഇറാനും തമ്മിലുള്ള നിർണ്ണായകമായ വെടിനിർത്തല് ചർച്ചകള്ക്കായി പാക്കിസ്ഥാനിലെത്തിയ ഇറാൻ പാർലമെന്റ് സ്പീക്കർ മുഹമ്മദ് ബാഗർ ഗാലിബാഫിന്റെ വിമാനത്തിനുള്ളില് നിന്നുള്ള ദൃശ്യങ്ങള് ആഗോള ശ്രദ്ധ നേടുന്നു.
സാധാരണ നയതന്ത്ര യാത്രകളില് നിന്ന് വ്യത്യസ്തമായി, യുദ്ധത്തിന്റെ നോവിക്കുന്ന ഓർമ്മകളെയും പ്രതിഷേധത്തെയും സാക്ഷിയാക്കിയാണ് ഇറാൻ പ്രതിനിധി സംഘം ഇസ്ലാമാബാദില് വിമാനമിറങ്ങിയത്.
ചർച്ചകള്ക്കായി ഇറാൻ സംഘം സഞ്ചരിച്ച വിമാനത്തിലെ ഒഴിഞ്ഞ സീറ്റുകളില് അമേരിക്കൻ ആക്രമണത്തില് കൊല്ലപ്പെട്ട എലിമെന്ററി സ്കൂള് കുട്ടികളുടെ ചിത്രങ്ങളാണ് പതിച്ചിരുന്നത്. കഴിഞ്ഞ ഫെബ്രുവരി 28-ന് മിനാബില് നടന്ന അമേരിക്കൻ വ്യോമാക്രമണത്തില് ദാരുണമായി കൊല്ലപ്പെട്ട പിഞ്ചുകുഞ്ഞുങ്ങളുടെ ചിത്രങ്ങളായിരുന്നു അവ.
“ഈ യാത്രയില് എന്റെ സഹയാത്രികർ” എന്ന തലക്കെട്ടോടെയാണ് സ്പീക്കർ മുഹമ്മദ് ബാഗർ ഗാലിബാഫ് ഈ ദൃശ്യങ്ങള് സമൂഹമാധ്യമമായ എക്സില് (X) പങ്കുവെച്ചത്. ലോക മനസ്സാക്ഷിയെ പിടിച്ചുലച്ച മിനാബ് സ്കൂള് ആക്രമണത്തില് 165 പേർ കൊല്ലപ്പെടുകയും നൂറിലധികം പേർക്ക് ഗുരുതരമായി പരിക്കേല്ക്കുകയും ചെയ്തിരുന്നു. കൊല്ലപ്പെട്ടവരില് ഭൂരിഭാഗവും നിഷ്കളങ്കരായ സ്കൂള് കുട്ടികളായിരുന്നു എന്ന വസ്തുത അന്താരാഷ്ട്ര തലത്തില് വലിയ പ്രതിഷേധത്തിന് കാരണമായിരുന്നു.
ഇസ്ലാമാബാദ് വിമാനത്താവളത്തില് ഇറങ്ങിയ ശേഷം മാധ്യമങ്ങളോട് സംസാരിക്കവെ ഗാലിബാഫ് ഇറാന്റെ നിലപാട് വ്യക്തമാക്കി. വെടിനിർത്തല് ചർച്ചകളില് തങ്ങള്ക്ക് നല്ല ഉദ്ദേശ്യമാണുള്ളതെന്ന് അദ്ദേഹം പറഞ്ഞു. എന്നാല്, ചർച്ചയുടെ മറുവശത്തുള്ള അമേരിക്കയെ തങ്ങള്ക്ക് ഒട്ടും വിശ്വാസമില്ലെന്ന് അദ്ദേഹം തുറന്നടിച്ചു.
“ഞങ്ങള് സമാധാനം ആഗ്രഹിക്കുന്നു, അതുകൊണ്ടാണ് ഈ ചർച്ചയ്ക്ക് വന്നത്. എന്നാല് അമേരിക്കയില് ഞങ്ങള്ക്ക് വിശ്വാസമില്ല. മുൻകാലങ്ങളില് സമാധാന ചർച്ചകള് പുരോഗമിക്കവെ തന്നെ അമേരിക്ക കരാറുകള് ലംഘിച്ച കയ്പ്പേറിയ അനുഭവങ്ങള് ഞങ്ങള്ക്കുണ്ട്. ആ ചതികള് മറന്നുകൊണ്ടുള്ള ഒരു നീക്കത്തിനും ഇറാൻ തയ്യാറല്ല.”
അമേരിക്കൻ ആക്രമണത്തിന് ഇരയായ കുട്ടികളുടെ ചിത്രങ്ങള് വിമാനത്തില് പ്രദർശിപ്പിച്ചത് വെറുമൊരു പ്രതീകാത്മക നീക്കമല്ല, മറിച്ച് ചർച്ചാ മേശയില് ഇറാൻ ഉയർത്താൻ പോകുന്ന ശക്തമായ നിലപാടിന്റെ സൂചന കൂടിയാണ്. തങ്ങളുടെ ജനത അനുഭവിച്ച ദുരിതങ്ങള് ലോകത്തിന് മുന്നില് ഒരിക്കല് കൂടി വിളിച്ചുപറഞ്ഞാണ് ഇറാൻ ചർച്ചകള്ക്ക് തുടക്കമിടുന്നത്.
മേഖലയിലെ സംഘർഷം ലഘൂകരിക്കുന്നതിനായി പാകിസ്ഥാന്റെ മധ്യസ്ഥതയിലാണ് ചർച്ചകള് നടക്കുന്നത്. മിനാബ് സ്കൂള് ആക്രമണത്തിന് ശേഷം ഇരുരാജ്യങ്ങളും തമ്മിലുള്ള ബന്ധം കൂടുതല് വഷളായിരുന്നു. ഈ സാഹചര്യത്തില് നടക്കുന്ന ചർച്ചകള് പശ്ചിമേഷ്യയിലെ സമാധാന ശ്രമങ്ങളില് നിർണ്ണായകമാകും. എങ്കിലും, അമേരിക്കൻ നിലപാടുകളിലുള്ള അവിശ്വാസം ഇറാൻ പരസ്യമായി പ്രകടിപ്പിച്ചത് ചർച്ചകളുടെ ഭാവി സംബന്ധിച്ച് വലിയ ചോദ്യചിഹ്നങ്ങള് ഉയർത്തുന്നുണ്ട്.
സ്വന്തം രാജ്യത്തെ കുട്ടികളുടെ ചിത്രങ്ങള് ഹൃദയത്തോട് ചേർത്തുപിടിച്ച് സമാധാനത്തിനായി ഇറാൻ നടത്തിയ ഈ യാത്ര ഇതിനോടകം തന്നെ ഇന്റർനെറ്റില് വൈറലായിക്കഴിഞ്ഞു. യുദ്ധത്തിന്റെ ഇരകളെ സ്മരിച്ചുകൊണ്ട് ഒരു രാഷ്ട്രത്തലവൻ നടത്തുന്ന ഇത്തരം ഇടപെടലുകള് ആഗോള നയതന്ത്ര തലത്തില് വലിയ ചർച്ചകള്ക്കാണ് വഴിതുറന്നിരിക്കുന്നത്.