നാളെ മുതൽ കേരള തീരത്ത് മത്സ്യബന്ധനത്തിന് വിലക്ക്
തിരുവനന്തപുരം: ബംഗാള് ഉള്ക്കടലില് രൂപം കൊണ്ട ന്യൂനമര്ദത്തിന്റെ പ്രഭാവം കേരളത്തിലും ഉണ്ടാകാനുള്ള സാധ്യത പ്രവചിക്കപ്പെട്ടിരിക്കുന്നതിനാല് പൊതുജനങ്ങളോട് ജാഗ്രത പാലിക്കാനും സര്ക്കാര് സംവിധാനങ്ങളോട് തയ്യാറെടുപ്പുകള് പൂര്ത്തീകരിക്കാനും സംസ്ഥാന ദുരന്ത നിവാരണ അതോറിറ്റി നിര്ദേശിച്ചു.
ഡിസംബര് 1 മുതല് കടല് അതിപ്രക്ഷുബ്ധമാകുവാന് സാധ്യതയുള്ളതിനാല് കേരള തീരത്ത് നിന്ന് കടലില് പോകുന്നത് നവംബര് 30 അര്ദ്ധരാത്രിയോടെ പൂര്ണ്ണമായും നിരോധിച്ചു. നിലവില് മത്സ്യബന്ധനത്തിന് പോയിട്ടുള്ളവര് നവംബര് 30 അര്ദ്ധരാത്രിയോടെ ഏറ്റവും അടുത്തുള്ള സുരക്ഷിത തീരത്ത് എത്തേണ്ടതാണെന്നും മുന്നറിയിപ്പ് നല്കി. ന്യൂനമര്ദത്തിന്റെ സ്വാധീനം കേരളത്തിലും പ്രതീക്ഷിക്കുന്ന സാഹചര്യത്തില് തെക്കന് കേരളത്തില് കനത്ത മഴക്കും ശക്തമായ കാറ്റിനും സാധ്യതയുണ്ട്.