പഞ്ചായത്തു മെമ്പറുടെ പ്രതിഫലം മുഴുവൻ മഞ്ചേശ്വരം താലൂക്കാശുപത്രിയിലെ ഡയാലിസിസ് രോഗികൾക്ക്

പഞ്ചായത്ത് അംഗമെന്ന നിലയിൽ തനിക്കു ലഭിക്കുന്ന മുഴുവൻ പ്രതിഫലവും മഞ്ചേശ്വരം താലൂക്ക് ആശുപത്രിയിലെ ഡയാലിസിസ് രോഗികൾക്ക് വേണ്ടി നൽകുമെന്ന് നിയുക്ത പഞ്ചായത്ത് മെമ്പർ ഇർഫാന അറിയിച്ചു . മംഗൽപ്പാടി ഗ്രാമ പഞ്ചായത്ത് രണ്ടാം വാർഡിൽ നിന്നും തിരഞ്ഞെടുക്കപ്പെട്ട യു.ഡി.എഫ് അംഗം ഇർഫാന ഇക്ബാലാണ് തനിക്ക് ലഭിക്കുന്ന മുഴുവൻ ശമ്പളവും മഞ്ചേശ്വരം താലൂക്ക് ആശുപത്രിയിലെ ഡയാലിസിസ് യൂണിറ്റിന് നൽകുമെന്നറിയിച്ചത് . നിത്യവൃത്തിക്ക് വകയില്ലാത്ത നിരവധി വൃക്കരോഗികളുള്ള മംഗൽപാടിയിൽ ചെറിയ സംഖ്യ തങ്ങളുടെ സർവീസ് ചാർജായി ആശുപത്രി അധികൃതർ ഈടാക്കുന്നുണ്ട് . ഇത് പല പാവപ്പെട്ട രോഗികൾക്കും ബുദ്ധിമുട്ടുണ്ടാക്കുന്നു . ഇതു പരിഹരിക്കാനാണ് തന്റെ അഞ്ചു വർഷത്തെ ശമ്പളം ഡയാലിസിസ് രോഗികൾക്ക് നൽകാൻ തീരുമാനിച്ചത് . ജനപ്രതിനിധികൾ കഴിയുമെങ്കിൽ ഇത്തരം രോഗികൾക്ക് ആശ്വാസമായാൽ ഭാവിയിൽ കൂടുതൽ രോഗികൾക്ക് ഈ ആശുപത്രിയിൽ ഡയാലിസിസ് ചെയ്യാൻ കഴിയുമെന്നും ഇർഫാന ഇഖ്ബാൽ പ്രത്യാശിച്ചു .