ലോക ടെസ്റ്റ് ചാമ്പ്യന്ഷിപ്പ് ഫൈനല്; ദേശീയ ഗാനത്തിനിടെ കണ്ണുനിറഞ്ഞ് രോഹിത്
ഓവല്: ലോക ടെസ്റ്റ് ചാമ്പ്യന്ഷിപ്പ് ഫൈനലിന് ലണ്ടനിലെ കെന്നിങ്ടണ് ഓവലില് തുടക്കമായിരിക്കുകയാണ്. മത്സരത്തില് ടോസിന്റെ ഭാഗ്യം ഇന്ത്യന് ക്യാപ്റ്റന് രോഹിത് ശര്മയ്ക്കായിരുന്നു. മത്സരത്തിനു മുമ്പ് ഇന്ത്യന് ദേശീയ ഗാനം ആലപിക്കുന്നതിനിടെ രോഹിത്തിന്റെ കണ്ണുകള് ഈറനണിയുകയും ചെയ്തു. ഇതിന്റെ ദൃശ്യങ്ങള് പെട്ടെന്നു തന്നെ സോഷ്യല് മീഡിയയില് വൈറലായി. പച്ചപ്പ് നിറഞ്ഞ കെന്നിങ്ടണ് ഓവലിലെ പിച്ചില് നാല് പേസര്മാരുമായാണ് ഇന്ത്യ ഇറങ്ങിയിരിക്കുന്നത്. മുഹമ്മദ് ഷമി, മുഹമ്മദ് സിറാജ് എന്നിവര്ക്കൊപ്പം ഉമേഷ് യാദവും ശാര്ദുല് താക്കൂറും പേസര്മാരായി ഇന്ത്യന് നിരയിലുണ്ട്. ഒരൊറ്റ സ്പിന്നറെ മാത്രമാണ് ഇന്ത്യ കളിപ്പിക്കുന്നത്. അശ്വിനെ ഒഴിവാക്കി ബാറ്റിങ് കൂടി കണക്കിലെടുത്ത് രവീന്ദ്ര ജഡേജയെ അവസാന ഇലവനില് ഉള്പ്പെടുത്തി. ശ്രീകര് ഭരതാണ് വിക്കറ്റിന് പിന്നില്. കഴിഞ്ഞ തവണ ന്യൂസീലന്ഡിനെതിരേ നഷ്ടപ്പെട്ട കിരീടം ഇത്തവണ തിരിച്ചുപിടിക്കാന് ഉറപ്പിച്ചാണ് ഇന്ത്യ ഇറങ്ങുന്നത്.