അമല് ജ്യോതി കോളേജിലെ സംഘര്ഷം; അമ്പതോളം വിദ്യാര്ത്ഥികള്ക്കെതിരെ പൊലീസ് കേസെടുത്തു
കാഞ്ഞിരപ്പള്ളി: അമല് ജ്യോതി കോളേജിലെ സംഘര്ഷത്തില് ചീഫ് വിപ്പിനെയും ഡിവൈഎസ്പിയേയും തടഞ്ഞ് വെച്ചതിന് വിദ്യാര്ത്ഥികള്ക്കെതിരെ പൊലീസ് കേസെടുത്തു. കണ്ടാലറിയുന്ന അമ്ബതോളം വിദ്യാര്ത്ഥികള്ക്കെതിരെയാണ് കേസെടുത്തിരിക്കുന്നത്. വിദ്യാര്ത്ഥികള്ക്കെതിരെ നടപടി ഉണ്ടാവില്ലെന്ന കോട്ടയം എസ്പി ഇന്നലെ പറഞ്ഞിരുന്നു. വിദ്യാര്ത്ഥിനി ജീവനൊടുക്കിയതിനെ തുടര്ന്ന് പ്രതിഷേധം ശക്തമായതോടെ കാഞ്ഞിരപ്പള്ളി അമല് ജ്യോതി എന്ജിനീയറിങ് കോളജ് അനിശ്ചിത കാലത്തേക്ക് അടച്ചിരുന്നു. രണ്ടാം വര്ഷ ഫുഡ് ടെക്നോളജി വിദ്യാര്ത്ഥിനി തൃപ്പൂണിത്തുറ തിരുവാങ്കുളം സ്വദേശി ശ്രദ്ധ സതീഷ് ആണ് (20) കഴിഞ്ഞ വെള്ളിയാഴ്ച രാത്രി ഒമ്ബതോടെ് കോളജ് ഹോസ്റ്റലില് ആത്മഹത്യക്ക് ശ്രമിച്ചത്. ഒപ്പം താമസിക്കുന്ന കുട്ടികള് ഭക്ഷണം കഴിക്കാന് പുറത്തുപോയി തിരിച്ചു വരുമ്ബോള് ഫാനില് തൂങ്ങിയ നിലയില് ശ്രദ്ധയെ കാണുകയായിരുന്നു. ഉടന് കുട്ടികള് വിവരം അറിയിച്ചതനുസരിച്ച് എത്തിയ കോളജ് ജീവനക്കാര് ശ്രദ്ധയെ ആശുപത്രിയില് എത്തിച്ചു. എന്നാല്, കുട്ടി തലകറങ്ങി വീണതാണെന്നാണ് കോളജ് അധികൃതര് ഡോക്ടറോട് പറഞ്ഞതെന്ന് ഒപ്പമുണ്ടായിരുന്ന വിദ്യാര്ത്ഥികള് ആരോപിക്കുന്നു. ആത്മഹത്യാശ്രമമാണ് എന്ന് പറഞ്ഞിരുന്നെങ്കില് ആ സാഹചര്യം അനുസരിച്ചുള്ള ചികിത്സ ലഭിക്കുമായിരുന്നെന്നും വിദ്യാര്ത്ഥികളും ബന്ധുക്കളും പറഞ്ഞു.