സംസ്ഥാനത്ത് ഇന്ന് 5 വ്യത്യസ്ത റോഡ് അപകടങ്ങളിലായി 8 പേര് മരിച്ചു
തിരുവനന്തപുരം: സംസ്ഥാനത്ത് വാഹനാപകട പരമ്ബര. അഞ്ചു വ്യത്യസ്ത അപകടങ്ങളിലായി ഇന്ന് 8 പേര് മരിച്ചു. അടൂര് എനാത്ത് കാറുകള് കൂട്ടിയിടിച്ചുണ്ടായ അപകടത്തില് ഒരു കുടുംബത്തിലെ മൂന്ന് പേരാണ് മരിച്ചത്. മടവൂര് സ്വദേശി രാജശേഖര ഭട്ടത്തിരി, ഭാര്യ ശോഭ, മകന് നിഖില് രാജ് എന്നിവരാണ് മരിച്ചത്. രാജശേഖര ഭട്ടത്തിരിയും ശോഭയും സംഭവസ്ഥലത്ത് തന്നെ മരിച്ചു. പരിക്കുകളോടെ കോട്ടയം മെഡിക്കല് കോളേജ് ആശുപത്രിയില് പ്രവേശിപ്പിച്ച നിഖില് രാജ് പിന്നീടാണ് മരിച്ചത്.
പാലക്കാട് കല്ലടിക്കോട് രാവിലെയുണ്ടായ വാഹനാപകടത്തിലും രണ്ട് പേര് മരിച്ചു. ബൈക്കും ഗ്യാസ് സിലിണ്ടര് കയറ്റിയ ലോറിയും തമ്മില് കൂട്ടിയിടിച്ചാണ് അപകടം ഉണ്ടായത്. ബൈക്ക് യാത്രികരാണ് മരിച്ചത്. മണ്ണാര്ക്കാട് സ്വദേശി ജോസ്, പയ്യനെടം സ്വദേശി രാജീവ് കുമാര് എന്നിവരാണ് അപകടത്തില് മരിച്ചത്. ഒരാള് സംഭവ സ്ഥലത്തും മറ്റൊരാള് തച്ചമ്ബാറയിലെ സ്വകാര്യ ആശുപത്രിയിലുമാണ് മരിച്ചത്. രാവിലെ ഏഴരയോടെയായിരുന്നു അപകടം. ബൈക്കില് ഇടിച്ച ശേഷം നിയന്ത്രണം വിട്ട ലോറി സമീപത്തെ പൊലീസ് സ്റ്റേഷന്റെ മതിലും തകര്ത്തു.
ഈരാറ്റുപേട്ടയ്ക്കടുത്തുണ്ടായ അപകടത്തില് ഇടമറുക് സ്വദേശി റിന്സ് (40) ആണ് മരിച്ചത്. കെഎസ്ആര്ടിസി ബസും ഗ്യാസ് കയറ്റി വന്ന ലോറിയും കൂട്ടിയിടിച്ചായിരുന്നു അപകടം. ഈരാറ്റുപേട്ട-തൊടുപുഴ റോഡില് കളത്തൂക്കടവിന് സമീപമാണ് അപകടം ഉണ്ടായത്. ഈരാറ്റുപേട്ടയില് നിന്ന് മേലുകാവ് ഭാഗത്തേയ്ക്ക് ഗ്യാസ് സിലിണ്ടറുമായി പോയ വാഹനം തൊടുപുഴയില് നിന്ന് എരുമേലിയിലേക്ക് പോയ ഫാസ്റ്റ് പാസഞ്ചറില് ഇടിക്കുകയായിരുന്നു. ഫയര്ഫോഴ്സെത്തി വാഹനം വെട്ടിപ്പൊളിച്ചാണ് റിന്സിനെ ഒടുവില് പുറത്തെടുത്തത്.