തമിഴകത്ത് ചക്രവാതച്ചുഴി; കേരളത്തില് അഞ്ച് ദിവസം മിന്നലോടുകൂടിയ മഴ, ജില്ലകള്ക്ക് മുന്നറിയിപ്പ്
തിരുവനന്തപുരം: കേരളത്തില് അടുത്ത അഞ്ച് ദിവസം ഇടിമിന്നലോട് കൂടിയ മഴയ്ക്ക് സാധ്യത. ബുധനാഴ്ച ഒറ്റപ്പെട്ട സ്ഥലങ്ങളില് അതിശക്തമായ മഴയ്ക്കും വെള്ളിയാഴ്ച വരെ ഒറ്റപ്പെട്ട സ്ഥലങ്ങളില് ശക്തമായ മഴയ്ക്കും സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്കി. തമിഴ്നാടിന് മുകളില് കേരളത്തിന് സമീപമായി സ്ഥിതി ചെയ്യുന്ന ചക്രവാതച്ചുഴിയുടെ സ്വാധീനമാണ് മഴയ്ക്ക് കാരണം. അതേസമയം കേരള, കര്ണ്ണാടക, ലക്ഷദ്വീപ് തീരങ്ങളില് മത്സ്യബന്ധനത്തിന് തടസമില്ല. അടുത്ത മൂന്ന് മണിക്കൂറില് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര് ജില്ലകളില് ഒറ്റപ്പെട്ടയിടങ്ങളില് ഇടിമിന്നലോട് കൂടിയ നേരിയതോ മിതമായതോ ആയ മഴയ്ക്ക് സാധ്യതയുണ്ട്. ഈ ജില്ലകളില് മണിക്കൂറില് 40 കിലോമീറ്റര് വരെ വേഗതയുള്ള ശക്തമായ കാറ്റിനും സാധ്യതയുണ്ട്. മറ്റെല്ലാ ജില്ലകളിലും ഒറ്റപ്പെട്ടയിടങ്ങളില് നേരിയ മഴയ്ക്ക് സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് അറിയിച്ചു. വിവിധ ജില്ലകള്ക്കുള്ള മഴ മുന്നറിയിപ്പുകള് നവംബര് 22 – പത്തനംതിട്ട, ഇടുക്കി ജില്ലകളില് ഓറഞ്ച് അലര്ട്ട്. തിരുവനന്തപുരം, കൊല്ലം, ആലപ്പുഴ, കോട്ടയം, എറണാകുളം, തൃശ്ശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളില് യെല്ലോ അലര്ട്ട്. നവംബര് 23 – തിരുവനന്തപുരം, പത്തനംതിട്ട, എറണാകുളം, ഇടുക്കി, വയനാട് ജില്ലകളില് യെല്ലോ അലര്ട്ട്. നവംബര് 24 – എറണാകുളം ജില്ലയില് യെല്ലോ അലര്ട്ട്. ബംഗാള് ഉള്ക്കടലിന് മുകളില് ന്യൂനമര്ദ്ദം തെക്കന് ആന്ഡമാന് കടലിന് മുകളില് ശനിയാഴ്ച ചക്രവാതച്ചുഴി രൂപപ്പെടുമെന്നും കാലാവസ്ഥാ വകുപ്പ് പറയുന്നു. ഈ ചക്രവാതച്ചുഴി ഞായറാഴ്ചയോടെ ന്യൂനമര്ദ്ദമായി ശക്തിപ്രാപിക്കാനും സാധ്യതയുണ്ട്. തുടര്ന്ന് പടിഞ്ഞാറ്, വടക്ക്-പടിഞ്ഞാറ് ദിശയില് സഞ്ചരിച്ച് തിങ്കളാഴ്ചയോടെ തെക്ക്-കിഴക്കന് ബംഗാള് ഉള്ക്കടലിനും ആന്ഡമാന് കടലിനും മുകളില് തീവ്രന്യൂനമര്ദ്ദമായി ശക്തിപ്രാപിക്കാനും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു.