രാഹുലിനെതിരായ നടപടിയിൽ വ്യാപക പ്രതിഷേധം; നിയമസഭയിൽ വാക്കൗട്ട്, ട്രെയിൻ തടഞ്ഞിട്ടു, പ്രതിഷേധ മാർച്ച്
കല്പ്പറ്റ: രാഹുല് ഗാന്ധിയെ എം.പി. സ്ഥാനത്തുനിന്ന് അയോഗ്യനാക്കിക്കൊണ്ടുള്ള ലോക്സഭാ സെക്രട്ടേറിയറ്റ് വിജ്ഞാപനം പുറത്തെത്തിയതിന് പിന്നാലെ രാജ്യത്തിന്റെ വിവിധഭാഗങ്ങളിലും നിയമസഭകളിലും കോണ്ഗ്രസ് പ്രതിഷേധം. രാഹുല് ഗാന്ധിയെ അയോഗ്യനാക്കിയതില് പ്രതിഷേധിച്ച് യൂത്ത് കോണ്ഗ്രസ് പ്രവര്ത്തകര് കണ്ണൂര് റെയില്വേ സ്റ്റേഷനിലേക്ക് പ്രകടനം നടത്തി സ്റ്റേഷന് കവാടത്തില് ടയര് കത്തിച്ചപ്പോള്| ഫോട്ടോ: റിധിന് ദാമു രാഹുലിന്റെ ലോക്സഭാ മണ്ഡലമായിരുന്ന വയനാട്ടിലെ കല്പ്പറ്റയില് പാര്ട്ടി പ്രവര്ത്തകര് പ്രതിഷേധിച്ചു. ഡി.സി.സി. ഓഫീസില്നിന്ന് പ്രതിഷേധ പ്രകടനവുമായി എത്തിയ പ്രവര്ത്തകര് ബി.എസ്.എന്.എല്. ഓഫീസിലേക്ക് തള്ളിക്കയറാനും ശ്രമിച്ചു. ഏറെനേരം ബി.എസ്.എന്.എല്. ഓഫീസിനു മുന്നില് കുത്തിയിരുന്നും പ്രതിഷേധിച്ചു. ഇതേത്തുടര്ന്ന് കല്പ്പറ്റ നഗരത്തില് ഗതാഗതം ഭാഗികമായി തടസ്സപ്പെട്ടു. ടി. സിദ്ദിഖ് എം.എല്.എ. ഉള്പ്പെടെയുള്ള നേതാക്കളാണ് പ്രതിഷേധത്തിന് നേതൃത്വം നല്കിയത്. മധ്യപ്രദേശില് യൂത്ത് കോണ്ഗ്രസ് പ്രവര്ത്തകര് സൂപ്പര് ഫാസ്റ്റ് ട്രെയിന് തടഞ്ഞു. ഭോപ്പാലിലെ റാണി കമലാപതി റെയില്വേ സ്റ്റേഷനിലാണ് സംഭവം. ദക്ഷിണ് എക്സ്പ്രസ് ട്രെയിനാണ് പ്രവര്ത്തകര് തടഞ്ഞത്. പ്രവര്ത്തകര് റെയില്പാളത്തിലും ട്രെയിനിന് മുകളിലുമായി നില്ക്കുന്നതിന്റെ ദൃശ്യങ്ങളും പുറത്തെത്തിയിട്ടുണ്ട്