ഗവർണർക്കെതിരായ പ്രതിഷേധം; റിപ്പോർട്ട് തേടി കേന്ദ്രം, സുരക്ഷയ്ക്കായി ബുള്ളറ്റ് പ്രൂഫ് വാഹനം ഉടനെത്തും
ന്യൂഡല്ഹി: ഗവർണർക്കെതിരായ പ്രതിഷേധങ്ങളിൽ റിപ്പോർട്ട് തേടി കേന്ദ്ര ആഭ്യന്തര മന്ത്രാലയം. ചീഫ് സെക്രട്ടറിയോടാണ് റിപ്പോര്ട്ട് ആവശ്യപ്പെട്ടിരിക്കുന്നത്. സെഡ് പ്ലസ് കാറ്റഗറി സുരക്ഷയുടെ ഭാഗമായുള്ള പ്രത്യേക ബുള്ളറ്റ് പ്രൂഫ് വാഹനം ഉടൻ എത്തിക്കുമെന്നും റിപ്പോർട്ട്.
കൊല്ലം നിലമേലില് ഗവര്ണര്ക്ക് നേരെ എസ്.എഫ്.ഐയുടെ കരിങ്കൊടി പ്രതിഷേധത്തെ തുടര്ന്നുണ്ടായ സംഭവവികാസങ്ങൾക്ക് പിന്നാലെ അദ്ദേഹത്തിന്റെ സുരക്ഷ കേന്ദ്ര സേന ഏറ്റെടുത്തിരുന്നു. പിന്നാലെ, ഗവര്ണര്ക്കും കേരള രാജ്ഭവനും സിആര്പിഎഫിന്റെ സെഡ് പ്ലസ് സുരക്ഷ ഏര്പ്പെടുത്തുന്നതായി കേന്ദ്ര ആഭ്യന്തര മന്ത്രാലയം രാജ്ഭവനെ അറിയിക്കുകയായിരുന്നു.
സദാനന്ദ ആശ്രമത്തില് നടക്കുന്ന ചടങ്ങ് ഉദ്ഘാടനം ചെയ്യാനായി തിരുവനന്തപുരത്തുനിന്നും നിലമേല് വഴി സദാനന്ദപുരത്തേക്ക് പോകുകയായിരുന്നു ഗവര്ണര്. യാത്രാമധ്യേയാണ് നിലമേല്വെച്ച് എസ്.എഫ്.ഐക്കാര് കരിങ്കൊടികളുമായി ഗവര്ണറുടെ വാഹനത്തിന് നേരെ പ്രതിഷേധവുമായി എത്തിയത്. ക്ഷുഭിതനായ ഗവര്ണര് കാറില് നിന്നിറങ്ങി പ്രതിഷേധക്കാര്ക്കുനേരെ കയര്ക്കുകയായിരുന്നു