അഞ്ചാംദിനവും വ്യാപക തിരച്ചിൽ: മരിച്ചവരുടെ എണ്ണം 352 ആയി, കണ്ടെത്താൻ ബാക്കി 206 പേർ; നാളെയും തിരച്ചിൽ

മേപ്പാടി: വയനാട് ഉരുൾപൊട്ടലിൽ കണ്ടെത്താനുള്ളവർക്കായി അഞ്ചാംദിനവും നടന്നത് വ്യാപകമായ തിരച്ചിൽ. 352 മൃതദേഹങ്ങൾ കണ്ടെത്തിയെന്നാണ് നിലവിൽ ലഭിക്കുന്ന അനൗദ്യോഗിക വിവരം. 206 പേരെ കണ്ടെത്താനുണ്ടെന്നാണ് കണക്ക്. വിവിധ സംഘങ്ങളായി തിരിഞ്ഞ് മുണ്ടക്കൈ, ചൂരൽമല, വെള്ളാർമല സ്കൂൾ, പുഞ്ചിരിമട്ടം തുടങ്ങിയ സ്ഥലങ്ങളിലാണ് ശനിയാഴ്ച പരിശോധന നടത്തിയത്. 

215 മൃതദേഹങ്ങൾ കണ്ടെത്തിയതായാണ് ഔദ്യോഗികമായി സ്ഥിരീകരിച്ചിരിക്കുന്നത്. അതിൽ 87 സ്ത്രീകളും 98 പുരുഷന്മാരുമുണ്ട്. 30 കുട്ടികൾക്കും ദുരന്തത്തിൽ ജീവൻ നഷ്ടമായതായി മുഖ്യമന്ത്രി അറിയിച്ചു. 148 മൃതദേഹങ്ങൾ കൈമാറിയിട്ടുണ്ട്. ഇനിയും കണ്ടെത്താൻ 206 പേരുണ്ട്. 81 പേർ വിവിധ ആശുപത്രികളിലായി നിലവിൽ ചികിത്സയിലാണ്. 206 പേരെ ഡിസ്ചാർജ് ചെയ്ത് ക്യാമ്പിലേക്ക് മാറ്റി. വയനാട്ടിൽ 93 ക്യാമ്പുകളിലായി 10,042 പേരുണ്ട്.

ചൂരൽമലയിലെ 10 ക്യാമ്പുകളിൽ 1707 പേർ താമസിക്കുന്നുണ്ട്. യന്ത്രസാമഗ്രികൾ പരമാവധി ഉപയോഗപ്പെടുത്തിക്കൊണ്ടുള്ള തിരച്ചിലാണ് ശനിയാഴ്ച നടന്നത്. ശനിയാഴ്ചത്തെ തിരച്ചിലില്‍ മലപ്പുറം മുണ്ടേരിയിലെ ചാലിയാറില്‍നിന്ന് മൃതദേഹങ്ങളും ശരീരഭാഗങ്ങളും കണ്ടെത്തി. ശനിയാഴ്ച മാത്രം മൂന്ന് മൃതദേഹങ്ങളും 13 ശരീരഭാഗങ്ങളുമാണ് കണ്ടെത്തിയത്.

ഇവ നിലമ്പൂര്‍ ജില്ലാ ആശുപത്രിയില്‍നിന്ന് വയനാട്ടിലേക്ക് കൊണ്ടുപോയി. ചാലിയാറില്‍നിന്ന് ശനിയാഴ്ച ആകെ 12 മൃതദേഹങ്ങള്‍ കണ്ടെടുത്തിട്ടുണ്ട്. രണ്ട് മൃതദേഹങ്ങള്‍ ചൂരല്‍മലയില്‍നിന്ന് കണ്ടെടുത്തതടക്കം ഇന്ന് ആകെ 14 മൃതദേഹങ്ങളാണ് കണ്ടെത്തിയത്. ചാലിയാറിന്റെ കോഴിക്കോട്, മലപ്പുറം ജില്ലകളുടെ ഭാഗങ്ങളില്‍ നാളെയും പരിശോധന തുടരും. വയനാട്ടിലെ ദുരന്തത്തില്‍ അഞ്ചുദിവസങ്ങളിലായി മലപ്പുറത്ത് ചാലിയാറില്‍നിന്ന് കണ്ടെത്തിയത് 73 മൃതദേഹങ്ങളും 132 ശരീരഭാഗങ്ങളുമാണ്.

മൃതദേഹങ്ങളില്‍ 37 പുരുഷന്‍മാരുടേതും 29 സ്ത്രീകളുടേതും ഏഴ് കുട്ടികളുടേതും ഉള്‍പ്പെടുന്നു. അതിനിടെ രക്ഷാപ്രവർത്തനത്തിനിടയിൽ സൂചിപ്പാറയിൽ കുടുങ്ങിയ മൂന്നു പേരെ സൈന്യം രക്ഷപ്പെടുത്തി. മലപ്പുറം സ്വദേശികളായ രഹീസ്, സ്വാലിം, മുഹ്സിൻ എന്നിവരാണ് കുടുങ്ങിയത്. മണിക്കൂറുകൾ നീണ്ട ആശങ്കകൾക്കൊടുവിലാണ് ഒരാളെ വടംകെട്ടിയും മറ്റു രണ്ടുപേരെ എയർലിഫ്റ്റ് ചെയ്തു രക്ഷപ്പെടുത്തിയത്. ഞായറാഴ്ച കേന്ദ്ര മന്ത്രി സുരേഷ് ഗോപി ഉരുൾപൊട്ടൽ മേഖലയും ദുരിതാശ്വാസ ക്യാമ്പും സന്ദർശിക്കുന്നുണ്ട്.