ചൂരല്മല-മുണ്ടക്കൈ ഉരുള്പ്പൊട്ടല്; 32 കാണാതായവരെ മരിച്ചവരായി കണക്കാക്കുമെന്ന് സര്ക്കാര്
തിരുവനന്തപുരം: ചൂരല്മല- മുണ്ടക്കൈ ഉരുള്പ്പൊട്ടലില് കാണാതായവരെ മരിച്ചവരായി കണക്കാക്കുമെന്ന് സര്ക്കാര്. ഉരുള്പ്പൊട്ടല് ഉണ്ടായി നാല് മാസം പിന്നിട്ടിട്ടും 32 പേര് ഇനിയും കാണാമറയത്താണ്. ദുരന്തബാധിതര്ക്ക് ധനസഹായം നല്കുന്നതിന് പ്രാദേശിക സമിതി, സംസ്ഥാനതല സമിതി എന്നിങ്ങനെ രണ്ട് സമിതികള് രൂപീകരിച്ച് സര്ക്കാര് ഉത്തരവിറക്കി.
വില്ലേജ് ഓഫീസറും, പഞ്ചായത്ത് സെക്രട്ടറിയും എസ്എച്ച്ഒയും ഉള്പ്പെടുന്നതാണ് പ്രാദേശിക സമിതി. കാണാതായവരെ മരിച്ചവരായി കണക്കാക്കി അടുത്ത ബന്ധുക്കള്ക്ക് നഷ്ടപരിഹാരം നല്കുകയെന്നതാണ് സമിതി രൂപീകരണത്തിലൂടെ സര്ക്കാര് ഉദ്ദേശിക്കുന്നത്. ആഭ്യന്തരവകുപ്പിന്റെ ചുമതലയുള്ള അഡീഷണല് ചീഫ് സെക്രട്ടറിയാണ് സംസ്ഥാനതല സമിതിയുടെ അധ്യക്ഷന്. റവന്യു വകുപ്പിന്റെയും തദ്ദേശവകുപ്പിന്റെ സെകട്ട്രറിമാരും സമിതിയിലുണ്ട്. ഇവര് പ്രാദേശിക സമിതിയുടെ റിപ്പോര്ട്ട് അംഗീകരിച്ച് മറ്റ് നടപടിക്രമങ്ങളിലേക്ക് നീങ്ങും. അതിന് പിന്നാലെ അടുത്ത ബന്ധുക്കള്ക്ക് മരണസര്ട്ടിഫിക്കറ്റ് നല്കും.